હૈદરાબાદ | તા.૧૧: સોમવારનો દિવસ ભારતીય જ્વેલરી ઉદ્યોગ અને શેરબજાર માટે બ્લેક મન્ડે સાબિત થયો છે. વડાપ્રધાન નરેન્દ્ર મોદીએ હૈદરાબાદમાં એક જાહેર કાર્યક્રમ દરમિયાન કરેલા સંબોધન પછી જ્વેલરી કંપનીઓના શેરમાં ભારે કડાકો જોવા મળ્યો હતો. ટાઇટન, કલ્યાણ જ્વેલર્સ અને સેન્કો ગોલ્ડ જેવી દિગ્ગજ કંપનીઓના રોકાણકારોએ જોતજોતામાં અબજો રૂપિયા ગુમાવ્યા છે. બજાર બંધ થયું ત્યાં સુધીમાં આ સેક્ટરે તેની માર્કેટ કેપમાંથી અંદાજે ₹35,000 કરોડ ધોઈ નાખ્યા હતા.
પીએમ મોદીની અપીલ: કેમ સોનું ન ખરીદવા કહ્યું?
હૈદરાબાદમાં જનમેદનીને સંબોધતા પીએમ મોદીએ દેશના વિદેશી હૂંડિયામણને બચાવવા અને અર્થતંત્રને મજબૂત કરવા માટે કેટલાક કઠોર પગલાં ભરવાની હિમાયત કરી હતી. તેમણે નાગરિકોને અપીલ કરી કે, "આવનારા એક વર્ષ સુધી લગ્ન માટે સોનાની ખરીદી ટાળો." આ સાથે જ તેમણે ઇંધણ બચાવવા માટે બિનજરૂરી આંતરરાષ્ટ્રીય મુસાફરી ટાળવા અને ફરીથી 'વર્ક ફ્રોમ હોમ' કલ્ચર અપનાવવા પર ભાર મૂક્યો હતો. પીએમની આ ટિપ્પણી સીધી જ સોનાની આયાત ઘટાડવા તરફ નિર્દેશ કરે છે, જેનાથી બજારમાં ગભરાટ ફેલાયો હતો.

શેરબજારમાં જ્વેલરી સ્ટોક્સનો રકાસ
પીએમના ભાષણની અસર સીધી જ બોર્ડ પર જોવા મળી હતી. ટાઇટન જેવી મજબૂત કંપનીનો શેર ૭% ઘટીને બંધ થયો હતો, જ્યારે કલ્યાણ જ્વેલર્સમાં ૯% થી વધુનો જંગી ઘટાડો નોંધાયો હતો. અન્ય કંપનીઓની સ્થિતિ પણ કફોડી રહી હતી:
કંપનીનું નામ    શેરનો ઘટાડો (%)
કલ્યાણ જ્વેલર્સ    ૯% થી વધુ
પીએન ગાડગીલ    ૮%
સેન્કો ગોલ્ડ    ૮%
ટાઇટન કંપની    ૭%
થંગામાઇલ    ૬%

આયાત ડ્યુટી વધવાની આશંકા અને ઉદ્યોગનો પક્ષ
સેન્કો ગોલ્ડના સુવંકર સેને CNBC-TV18 સાથેની વાતચીતમાં જણાવ્યું કે, વડાપ્રધાનની આ ટિપ્પણી બાદ એવી પ્રબળ શક્યતા છે કે સરકાર સોના પરની આયાત ડ્યુટીમાં વધારો કરી શકે છે. જો આવું થશે, તો સોનાના વેચાણમાં ૧૦% થી ૧૨% નો ઘટાડો થઈ શકે છે. તેમણે સૂચન કર્યું કે ભારતીય ઘરોમાં પડેલું ૨૦,૦૦૦ ટન સોનું બહાર લાવવા માટે સરકારે નવી યોજનાઓ વિચારવી જોઈએ.
આવતીકાલે પીએમઓ સાથે બેઠક
સોનાના બજારમાં સર્જાયેલી આ અસ્થિરતા વચ્ચે જ્વેલરી એસોસિએશનના પ્રતિનિધિઓ મંગળવારે વડાપ્રધાન કાર્યાલય (PMO) ના અધિકારીઓ સાથે મુલાકાત કરશે. જ્વેલર્સની ચિંતા છે કે જો લગ્નની સીઝનમાં જ ખરીદી અટકી જશે, તો લાખો લોકોની રોજીરોટી પર અસર પડી શકે છે. ભારત દર મહિને સરેરાશ ૬૦ ટન સોનું આયાત કરે છે, જેનો ખર્ચ અંદાજે $6 બિલિયન છે. હવે સરકારના આગામી કદમ પર આખા દેશની નજર છે.