કોલકતાઃ પશ્ચિમ બંગાળ વિધાનસભા ચૂંટણીની મતગણતરી આડે હવે ગણતરીના કલાકો જ બાકી છે ત્યારે રાજ્યમાં રાજકીય હિંસાનો ગ્રાફ ફરી ઉંચકાયો છે. ઉત્તર 24 પરગણા જિલ્લાના નોઆપરા વિસ્તારમાં શનિવારે મોડી રાત્રે ભાજપ નેતા કુંદન સિંહના નિવાસસ્થાનને નિશાન બનાવીને કરવામાં આવેલા ગોળીબારે સમગ્ર વિસ્તારમાં તણાવ પેદા કર્યો છે. આ ઘટનાએ ચૂંટણી પરિણામો પહેલા સુરક્ષા વ્યવસ્થા સામે ગંભીર સવાલો ઉભા કર્યા છે.

શનિવારે મોડી રાત્રે ગારુલિયા વિસ્તારમાં સ્થિત ભાજપ નેતા કુંદન સિંહના ઘરની બહાર મોટરસાઇકલ પર બે અજાણ્યા યુવાનો આવ્યા હતા. અહેવાલો અનુસાર, બાઇક પર પાછળ બેઠેલા યુવકે અચાનક કુંદન સિંહના ઘર તરફ બે રાઉન્ડ ગોળીબાર કર્યો હતો. હુમલો કર્યા બાદ બંને શખ્સો ઘટનાસ્થળેથી નાસી છૂટવામાં સફળ રહ્યા હતા.

આ હુમલાની સમગ્ર ઘટના નજીકમાં લાગેલા સીસીટીવી (CCTV) કેમેરામાં કેદ થઈ ગઈ હતી. સીસીટીવી ફૂટેજને મહત્વના પુરાવા તરીકે ગણીને પોલીસે તાત્કાલિક તપાસ હાથ ધરી હતી. ઝડપી કાર્યવાહી કરતા પોલીસે આકાશ ચૌધરી અને અમનદીપ ચૌધરી નામના બે આરોપીઓની ધરપકડ કરી છે. પોલીસે આરોપીઓ પાસેથી એક હથિયાર પણ જપ્ત કર્યું છે. હાલમાં એ તપાસ કરવામાં આવી રહી છે કે શું આ જ હથિયારથી કુંદન સિંહના ઘર પર ફાયરિંગ કરવામાં આવ્યું હતું કે કેમ.