અમેરિકામાં ડોક્ટરોની અછતઃ ટ્રમ્પે ઇમિગ્રેશન અરજીઓ પરનો પ્રતિબંધ આંશિક રીતે હટાવ્યો
સ્વાસ્થ્ય સેવાઓ ખોરવાતા વિદેશી તબીબોની ઇમિગ્રેશન ફાઈલો ફરી ખોલવાનો નિર્ણયઃ વિદેશી ડોકટરોને મળી મોટી રાહતઃ ૩૯ દેશો પર હજુ પણ રોક : ગ્રીન કાર્ડની મંજૂરી અંગે હજુ પણ અનિશ્ચિતતા અને અવિશ્વાસનો માહોલઃ ગ્રામીણ વિસ્તારોમાં દર્દીઓની હાલાકી વધતા લેવાયો મોટો નિર્ણય
વોશિંગ્ટન, તા.૮: અમેરિકામાં સ્વાસ્થ્ય ક્ષેત્રે સર્જાયેલી કટોકટી વચ્ચે ટ્રમ્પ વહીવટીતંત્રે એક મોટો નિર્ણય લીધો છે. વર્ષોથી ઇમિગ્રેશન પર કડક વલણ રાખનાર ડોનાલ્ડ ટ્રમ્પે હવે વિદેશી ડોક્ટરો માટેની અરજીઓ પરનો પ્રતિબંધ આંશિક રીતે હટાવી લીધો છે. આ નિર્ણય પાછળનું મુખ્ય કારણ અમેરિકાના ગ્રામીણ વિસ્તારોમાં ડોક્ટરોની ભયાનક અછત છે, જ્યાં દર્દીઓને નિષ્ણાત તબીબને મળવા માટે ૪ થી ૫ મહિનાનું લાંબુ વેઇટિંગ કરવું પડે છે. જોકે, આ છૂટછાટ માત્ર સમીક્ષા માટે છે; જેનો અર્થ એ નથી કે ડોક્ટરોને સીધા જ વિઝા કે ગ્રીન કાર્ડ મળી જશે. આ અનિﾍતિતાએ હજારો તબીબોના શ્વાસ અધ્ધર કરી દીધા છે.
લિબિયન ડોક્ટર ફૈઝલ અલ્ઘોલાની સ્થિતિ અત્યારે અમેરિકામાં રહેતા હજારો વિદેશી ડોક્ટરો જેવી જ છે. તેઓ ઇન્ડિયાનામાં ૧,૦૦૦ જેટલા દર્દીઓની સેવા કરી રહ્યા છે, પરંતુ તેમના વિઝાની મુદત સપ્ટેમ્બરમાં પૂરી થઈ રહી છે. ટ્રમ્પ પ્રશાસને અગાઉ હાઈ-રિસ્ક ગણાતા દેશોની ફાઈલો અટકાવી દીધી હતી, જેમાં અલ્ઘોલાનો પણ સમાવેશ થાય છે. ભલે હવે ફાઈલોની તપાસ શરૂ કરવાની મંજૂરી અપાઈ હોય, પણ ડોક્ટરોમાં એક એવો ડર ઘર કરી ગયો છે કે રિન્યુઅલ ઇન્ટરવ્યુમાં જતી વખતે કયાંક તેમની અટકાયત કરવામાં ન આવે. આ માનસિક દબાણ વચ્ચે અમેરિકાના આરોગ્ય તંત્રને ટકાવી રાખવું એ એક મોટો પડકાર બની ગયો છે.
બીજી તરફ, આ રાહત માત્ર ડોક્ટરો પૂરતી મર્યાદિત રહેતા અન્ય ૩૯ દેશોના હજારો સંશોધકો અને ઉદ્યોગસાહસિકો હજુ પણ મુશ્કેલીમાં છે. ઈરાન, અફઘાનિસ્તાન અને વેનેઝુએલા જેવા દેશોના તેજસ્વી મગજો અત્યારે ન તો ડ્રાઇવિંગ લાયસન્સ મેળવી શકે છે કે ન તો હેલ્થ ઇન્શ્યોરન્સ. મેમ્ફિસના ઇમિગ્રેશન એટર્ની ગ્રેગ સિસ્કિન્ડના જણાવ્યા મુજબ, આ નીતિઓનો છૂપો હેતુ કાયદેસર રીતે રહેતા લોકોનું જીવન એટલું મુશ્કેલ બનાવવાનો છે કે તેઓ પોતે જ દેશ છોડીને ચાલ્યા જાય. આ પરિસ્થિતિમાં ઇરાની ડોક્ટર ઝહરા શોકરી જેવી વ્યક્તિઓ ન્યાય માટે ફેડરલ કોર્ટના દ્વાર ખટખટાવી રહી છે, પરંતુ ત્યાં પણ સરકારના કડક વલણનો સામનો કરવો પડી રહ્યો છે.
સરકારે આ કડક સ્ક્રીનિંગ પ્રક્રિયા પાછળ રાષ્ટ્રીય સુરક્ષાનો તર્ક આપ્યો છે. અગાઉ બનેલી હિંસક ઘટનાઓ બાદ હોમલેન્ડ સિકયુરિટી વિભાગ કોઈપણ પ્રકારનું જોખમ લેવા માંગતું નથી. પરંતુ સવાલ એ ઉભો થાય છે કે શું સુરક્ષાના નામે કરવામાં આવતી આ જટિલ તપાસ ખરેખર ન્યાયપૂર્ણ છે? જ્યારે દેશના ગ્રામીણ વિસ્તારોમાં પલ્મોનોલોજિસ્ટ અને આઈસીયુ નિષ્ણાતોની આટલી મોટી અછત હોય, ત્યારે ટેલેન્ટેડ ડોક્ટરોને જેલ કે દેશનિકાલનો ડર બતાવીને અમેરિકા પોતાની જ જનતાના સ્વાસ્થ્ય સાથે જોખમ ખેડી રહ્યું હોય તેવું જણાય છે.
(2:39 PM IST)
છેલ્લા 8 દિવસમાં સૌથી લોકપ્રિય 
