અમદાવાદ : આઇપીએલ ૨૦૨૬ની ફાઇનલ મેચમાં પરાજય બાદ ગુજરાત ટાઇટન્સની ટીમ માટે રવિવારની રાત વધુ કપરી સાબિત થઈ હતી. નરેન્દ્ર મોદી સ્ટેડિયમથી મેચ પૂર્ણ કરીને ખેલાડીઓ અને સપોર્ટ સ્ટાફને હોટેલ પરત લઈ જઈ રહેલી ટીમ બસમાં અચાનક શોર્ટ સર્કિટ થવાના કારણે આગ લાગવાની ઘટના સામે આવી હતી. બસની અંદર મોટો ધુમાડો ફેલાઈ જતાં તાત્કાલિક તમામ ખેલાડીઓ અને સ્ટાફ સભ્યોને બહાર કાઢવામાં આવ્યા હતા. આ ઘટનાને પગલે ખેલાડીઓ લાંબા સમય સુધી રસ્તા કિનારે અટવાયા હતા, જોકે સદનસીબે તમામ સભ્યો સંપૂર્ણપણે સુરક્ષિત હોવાના અહેવાલ પ્રાપ્ત થયા છે.
*બસમાં ધુમાડો ફેલાતા ખેલાડીઓ રસ્તા પર ઉતરી પડ્યા*
પ્રાપ્ત વિગતો અનુસાર, રોયલ ચેલેન્જર્સ બેંગ્લુરુ સામે પાંચ વિકેટે ફાઇનલ મેચ હાર્યાના ગણતરીના કલાકોમાં જ ગુજરાત ટાઇટન્સની સ્ક્વોડ સાથે આ ચિંતાજનક ઘટના ઘટી હતી. હોટેલ તરફ જઈ રહેલી બસના વાયરિંગમાં અચાનક શોર્ટ સર્કિટ થતાં વાહન રસ્તા વચ્ચે જ ખોટવાઈ ગયું હતું અને અંદર ધુમાડાના ગોટેગોટા ફેલાઈ ગયા હતા. પરિસ્થિતિ વણસે તે પહેલાં જ સાવચેતીના પગલાં રૂપે તમામ મુસાફરોને તાત્કાલિક બહાર કાઢી લેવાયા હતા. અન્ય વૈકલ્પિક વ્યવસ્થા ન થાય ત્યાં સુધી કેપ્ટન શુભમન ગિલ સહિતના ખેલાડીઓ અને સપોર્ટ સ્ટાફને આશરે એક કલાક સુધી રસ્તાની બાજુમાં જ રાહ જોવી પડી હતી. ત્યારબાદ અન્ય એક બસની વ્યવસ્થા કરીને તમામને હોટેલ પહોંચાડવામાં આવ્યા હતા.
*ટોપ ઓર્ડર ફ્લોપ રહેતા આઇપીએલ ટ્રોફી હાથમાંથી સરકી*
આ ટાઇટલ મુકાબલામાં ગુજરાત ટાઇટન્સનો ટોપ ઓર્ડર સંપૂર્ણપણે નિષ્ફળ રહ્યો હતો. કેપ્ટન શુભમન ગિલ, સાઇ સુદર્શન અને જોસ બટલર જેવા દિગ્ગજ બેટ્સમેનો ૨૦ રનના આંકડા સુધી પણ પહોંચી શક્યા ન હતા. મિડલ ઓર્ડરની નબળાઈઓ ખુલ્લી પડી જતાં ટીમ નિર્ધારિત ૨૦ ઓવરમાં ૮ વિકેટે માત્ર ૧૫૫ રન જ બનાવી શકી હતી, જેને આરસીબીએ સરળતાથી ચેઝ કરીને સતત બીજી વખત આઇપીએલ ટ્રોફી પર કબજો કર્યો હતો. હાર બાદ કેપ્ટન શુભમન ગિલે જણાવ્યું હતું કે, ભલે અમે ટ્રોફી જીતી શક્યા નથી, પરંતુ એક ટીમ તરીકે હજુ પણ ઘણી એવી બાબતો છે જેમાં અમારે સુધારો કરવાની જરૂર છે.
*વ્યસ્ત શેડ્યૂલ અને ખરાબ હવામાનનો સામનો કરવો પડ્યો હતો*
ગુજરાત ટાઇટન્સ માટે પ્લેઓફની સફર અને પ્રવાસનું શેડ્યૂલ અત્યંત કઠિન રહ્યું હતું. ટીમ લીગ સ્ટેજ પૂર્ણ કર્યા બાદ ક્વોલિફાયર ૧ રમવા ધર્મશાલા ગઈ હતી. ત્યાં પરાજય બાદ ટીમ ૨૭ મેના રોજ ચંદીગઢ થઈને મુલ્લાનપુર પહોંચી હતી, જ્યાં ૨૯ મેના રોજ ક્વોલિફાયર ૨ માં રાજસ્થાન રોયલ્સને હરાવીને ફાઇનલમાં જગ્યા બનાવી હતી. જોકે, ૩૦ મેના રોજ મુલ્લાનપુરમાં ખરાબ હવામાન અને ભારે વરસાદના કારણે અમદાવાદ આવતી ચાર્ટર ફ્લાઇટ આશરે ત્રણ કલાક મોડી પડી હતી. આ વિલંબના કારણે શુભમન ગિલ અને આરસીબીના કેપ્ટન રજત પાટીદાર વચ્ચે યોજાનાર પ્રી-મેચ કેપ્ટન્સ ફોટોશૂટ પણ મોકૂફ રાખવું પડ્યું હતું અને ટીમને ફાઇનલ મેચની તૈયારી માટે ૨૪ કલાકથી ઓછો સમય મળ્યો હતો.
*ડિરેક્ટર વિક્રમ સોલંકીએ થાકનું બહાનું કાઢવાનો ઇનકાર કર્યો*
ટૂંકા ગાળામાં સતત પ્રવાસ અને મેચોના કારણે ખેલાડીઓ થાકી ગયા હોવાથી ફાઇનલમાં પ્રદર્શન નબળું રહ્યું હોવાની ચર્ચાઓ વચ્ચે ગુજરાત ટાઇટન્સના ડાયરેક્ટર ઓફ ક્રિકેટ વિક્રમ સોલંકીએ શેડ્યૂલને પરાજયનું બહાનું બનાવવાનો સ્પષ્ટ ઇનકાર કર્યો હતો. તેઓએ મેચ બાદ પત્રકાર પરિષદમાં જણાવ્યું હતું કે, "ઓછા દિવસોમાં વધુ મેચો રમવી પડકારજનક ચોક્કસ હોય છે, પરંતુ હું આરસીબીની જીતનો શ્રેય એવું કહીને ઓછો કરવા નથી માંગતો કે અમારા ખેલાડીઓ થાકેલા હતા. અમારો સ્કોર ચોક્કસપણે ઓછો હતો, તેમ છતાં બોલર્સે તેને ડિફેન્ડ કરવા માટે શાનદાર લડત આપી હતી. પ્રતિસ્પર્ધી ટીમ અમારા કરતાં વધુ સારું રમી તે સ્વીકારીને આપણે તેમને અભિનંદન આપવા જોઈએ."