​કાનપુર/રેઉના: અમેઠી જિલ્લાના મોહનગંજ પોલીસ સ્ટેશનમાં ફરજ બજાવતી 22 વર્ષીય મહિલા કોન્સ્ટેબલ પ્રતિક્ષા સિંહના શંકાસ્પદ આપઘાત પ્રકરણમાં પોલીસ તપાસ દરમિયાન ભારે ચોંકાવનારી અને સળગતી વિગતો સામે આવી છે. કાનપુરના રેઉના થાણા વિસ્તાર સ્થિત નિવાસસ્થાનેથી મળેલા મૃતદેહ અને ત્યારબાદ હાથ ધરાયેલી ઊંડાણપૂર્વકની તપાસમાં જાણવા મળ્યું છે કે મૃતક મહિલા સિપાહી અને તેનાથી ઉંમરમાં 23 વર્ષ મોટા તથા બે બાળકોના પિતા એવા કોચિંગ સેન્ટરના સંચાલક વિક્રમ સિંહ ચંદેલ વચ્ચે ઘનિષ્ઠ પ્રેમસંબંધો ચાલી રહ્યા હતા. ટેકનિકલ સર્વેલન્સ અને કૉલ ડિટેલ રેકોર્ડ (CDR) પરથી સામે આવેલા આંકડા અનુસાર, છેલ્લા ૯ મહિનાના ટૂંકા ગાળામાં બંને વચ્ચે ૫,૦૦૦થી વધુ વખત ટેલિફોનિક વાતચીત થઈ હતી, જેમાં કેટલીક કોલિંગ તો સતત ૪-૪ કલાક સુધી ચાલી હતી.

​પોલીસ કમિશ્નરેટ દક્ષિણ વિસ્તારના ડીસીપી દીપેન્દ્ર નાથ ચૌધરીએ સમગ્ર બનાવ અંગે માહિતી આપતા જણાવ્યું હતું કે વર્ષ ૨૦૨૨માં પોલીસ ભરતીની તૈયારી દરમિયાન પ્રતિક્ષા સિંહે સચેંડી નજીકના વિનોર ગામના રહેવાસી વિક્રમ સિંહ ચંદેલની કોચિંગ એકેડેમીમાં પ્રવેશ મેળવ્યો હતો. આ સમયગાળા દરમિયાન જ શિક્ષક અને છાત્રા વચ્ચે સંબંધો ગાઢ બન્યા હતા. વર્ષ ૨૦૨૫માં પ્રતિક્ષાની પોલીસ દળમાં પસંદગી થઈ ગયા બાદ તેને અમેઠીના મોહનગંજ થાણામાં પોસ્ટીંગ મળ્યું હતું. જોકે, નોકરીમાં જોડાયા બાદ પ્રતિક્ષાની અન્ય એક સહકર્મી સાથે પણ વાતચીત શરૂ થતાં ૪૫ વર્ષીય વિક્રમ સિંહને શંકા ગઈ હતી. આ બાબતે બંને વચ્ચે અવારનવાર ઉગ્ર ઘર્ષણ અને માનસિક તણાવ ઊભો થતો હતો.

​બનાવના દિવસે એટલે કે ૩૦ સપ્ટેમ્બરના રોજ પ્રતિક્ષા પોતાના ઘરે ૭ દિવસની રજાઓ ગાળવા આવી હતી. તે જ દિવસે બપોરના સમયે આપઘાત કરતા પહેલા પ્રતિક્ષા અને કોચિંગ સંચાલક વિક્રમ વચ્ચે ત્રણ તબક્કામાં લાંબી વાતચીત થઈ હતી. સવારે ૮:૩૦ વાગ્યે અડધો કલાક, ૧૧ વાગ્યે ૧૫ મિનિટ અને બપોરે ૧ થી ૨ વાગ્યા દરમિયાન ૪૫ મિનિટ સુધી બંને વચ્ચે ઉગ્ર બોલાચાલી થઈ હોવાનું સામે આવ્યું છે. તદુપરાંત, પ્રતિક્ષાએ આપઘાતની થોડી ક્ષણો પહેલા અમેઠીમાં તૈનાત અન્ય એક સિપાહી સાથે પણ ૩૫ મિનિટ સુધી ચર્ચા કરી હતી. ત્યારબાદ તેણે પોતાના સ્માર્ટફોનનો તમામ ડેટા ફેક્ટરી રિસેટ કરી નાખ્યો હતો અને ઘરના ઉપરના માળે રૂમમાં ફાંસો ખાઈ જીવન ટૂંકાવી લીધું હતું.

​મૃતકના પિતા વિજય સિંહના જણાવ્યા અનુસાર, વિક્રમ સિંહ ચંદેલ ધર્મનો ભાઈ બનીને તેમના ઘરે આવતો-જતો હતો અને પરિવારનો વિશ્વાસ જીતી લીધો હતો. પરંતુ પીઠ પાછળ તે પ્રતિક્ષાને બ્લેકમેલ અને માનસિક રીતે ટોર્ચર કરી રહ્યો હતો. પિતાની ફરિયાદના આધારે પોલીસે ૪૫ વર્ષીય વિક્રમ સિંહ સામે આત્મહત્યાની દુષ્પ્રેરણા (ધારા ૧૦૮) હેઠળ ગુનો નોંધી તેની અટકાયત કરી લીધી છે. આ સિવાય મૃતકના પિતાએ મોહનગંજ પોલીસ સ્ટેશનના કેટલાક ખાતાકીય કર્મચારીઓ અને ઉપરી અધિકારીઓ પર પણ રજા ન આપવા તથા કાર્યસ્થળ પર માનસિક હેરાનગતિ કરવાનો આક્ષેપ કર્યો છે, જે દિશામાં પણ ઉચ્ચ પોલીસ અધિકારીઓ દ્વારા તપાસના ચક્ર ગતિમાન કરવામાં આવ્યા છે.