તા. 20, જુલાઈ 2026: મુંબઈ: મહારાષ્ટ્રના રાજકારણમાં ચોમાસુ સત્રની શરૂઆત પહેલા જ એક બહુ મોટો રાજકીય ભૂકંપ આવ્યો છે. લોકસભાના અધ્યક્ષ ઓમ બિરલાએ શિવસેના (UBT) એટલે કે ઉદ્ધવ ઠાકરે જૂથના છ બળવાખોર સાંસદોના સત્તાધારી શિવસેનામાં વિલયને ઔપચારિક રીતે માન્યતા આપી દીધી છે. પક્ષપલટા વિરોધી કાયદા હેઠળ મળેલી આ કાનૂની મહોર બાદ, મહારાષ્ટ્રના નાયબ મુખ્યમંત્રી એકનાથ શિંદેએ વિરોધીઓ પર આકરા પ્રહારો કર્યા છે અને સાંસદોના નિર્ણયનો મજબૂત બચાવ કર્યો છે.

વિકાસ માટે પક્ષ બદલ્યો, વ્યક્તિગત લાભ માટે નહીં

આ ઐતિહાસિક વિલય બાદ મીડિયા સાથે વાતચીત કરતા નાયબ મુખ્યમંત્રી એકનાથ શિંદેએ પક્ષપલટાના આરોપોને સખત શબ્દોમાં ફગાવી દીધા હતા. તેમણે જણાવ્યું હતું કે, “અમારી સાથે જોડાયેલા છ સાંસદોએ કોઈ વ્યક્તિગત સ્વાર્થ કે લાભ માટે આ પગલું નથી ભર્યું, પરંતુ તેઓ પોતાના મતવિસ્તારમાં વિકાસ લાવવા માંગે છે. જે લોકો અમારા પર પૈસા લેવાના આરોપો લગાવી રહ્યા છે, તેઓ પોતે પૈસા સિવાય બીજું કંઈ જોતા નથી, કારણ કે તેમની માનસિકતા જ માત્ર પૈસા લેવાની છે, આપવાની નથી.” શિંદેએ ઉમેર્યું કે જ્યારે આ નેતાઓ પેલા જૂથમાં હોય છે ત્યારે સારા ગણાય છે, અને પક્ષ છોડતા જ ખરાબ થઈ જાય છે, આ બેવડું વલણ યોગ્ય નથી.

અમિત શાહ સાથે બેઠક અને મજબૂત વ્યૂહરચના

એકનાથ શિંદેએ સાંસદોના મતવિસ્તારના પ્રશ્નોને હલ કરવાની ખાતરી આપતા કહ્યું, “અમે આ સંદર્ભમાં દેશના ગૃહમંત્રી અમિત શાહ સાથે પણ એક મહત્વની બેઠક કરી છે. અમે એ સુનિશ્ચિત કરીશું કે આ તમામ છ સાંસદોના વિસ્તારોના અટકેલા વિભાગીય કાર્યો પ્રાથમિકતાના ધોરણે પૂર્ણ થાય અને તેમને પૂરતું વિકાસ ભંડોળ પૂરું પાડવામાં આવે.”

ચોમાસુ સત્ર પહેલા લોકસભામાં શિંદેની તાકાત બમણી

નોંધનીય છે કે, ઉદ્ધવ ઠાકરે જૂથથી અલગ થયેલા આ છ સાંસદોએ આશરે એક મહિના પહેલા શિંદેના નેતૃત્વ હેઠળની શિવસેનામાં જોડાવાની સત્તાવાર અરજી લોકસભા સચિવાલયમાં આપી હતી. આ મંજૂરી મળ્યા બાદ, ૨૦ જુલાઈથી શરૂ થઈ રહેલા સંસદના ચોમાસુ સત્ર પહેલા જ લોકસભામાં શિંદેની શિવસેનાના સાંસદોની સંખ્યા વધીને ૧૩ થઈ ગઈ છે, જે પક્ષ માટે બહુ મોટી જીત માનવામાં આવે છે.

પક્ષ બદલનારા દિગ્ગજ સાંસદોમાં ઓમરાજે નિમ્બાલકર (ધારાશિવ), નાગેશ પાટિલ અષ્ટિકર (હિંગોલી), સંજય જાધવ (પરભણી), સંજય દેશમુખ (યવતમાળ-વાશિમ), ભાઉસાહેબ વાકચૌરે (શિરડી) અને સંજય દિના પાટિલ (મુંબઈ ઉત્તર પૂર્વ) નો સમાવેશ થાય છે. આ વિલયથી મહારાષ્ટ્રમાં આગામી દિવસોમાં રાજકીય ગરમાવો વધુ વધવાની પૂરેપૂરી શક્યતા છે