ભોપાલ: ભારત એક એવો દેશ છે જે સાચે જ 'ચા' પર ચાલે છે. સવારની શરૂઆતથી લઈને ઓફિસના થાક સુધી, અહીં ચા માત્ર એક પીણું નથી પણ એક લાગણી છે. પરંતુ, હવે ભારતીયોની ચા પીવાની આદતોમાં એક મોટો અને ખૂબ જ રસપ્રદ બદલાવ જોવા મળી રહ્યો છે. તાજેતરના એક આંકડાકીય વિશ્લેષણ મુજબ, ભારતના ગ્રાહકો હવે પરંપરાગત દૂધ-ખાંડવાળી ચાથી આગળ વધીને અવનવા પ્રયોગો તરફ વળ્યા છે. દેશમાં વેલનેસ બ્રુ, કોમ્બુચા અને ફ્રૂટ-ઇન્ફ્યુઝ્ડ (ફળોના સ્વાદવાળી) રેડી-ટુ-ડ્રિંક (RTD) ચાનો ક્રેઝ અભૂતપૂર્વ ઝડપે વધી રહ્યો છે.

સુવિધા બની સૌથી મોટું કારણ: 'રેડી-ટુ-ડ્રિંક' નો જમાનો

જૂન ૨૦૨૫ થી જૂન ૨૦૨૬ વચ્ચે દેશના ૧૩૦ થી વધુ શહેરોના ઓર્ડર ટ્રેન્ડ્સના આધારે બહાર આવેલા અહેવાલ મુજબ, ભારતમાં હાલ 'ગ્રેબ-એન્ડ-ગો' એટલે કે તરત જ પી શકાય તેવી તૈયાર બોટલ કે કેન વાળી ચા (Ready-to-Drink Tea) નું બજાર વાર્ષિક ધોરણે ૧૦૯% ના દરે વધી રહ્યું છે. ઇન્સ્ટામાર્ટ જેવા ક્વિક-કોમર્સ પ્લેટફોર્મ પર આ સેગમેન્ટ સૌથી ઝડપી દોડી રહ્યું છે, કારણ કે આજની ભાગદોડ ભરી જિંદગી અને વ્યસ્ત લાઈફસ્ટાઈલમાં લોકો ઉકાળવાની ઝંઝટ વિના સીધી જ ચા પીવાનું વધુ પસંદ કરી રહ્યા છે.

પીચ ટી અને બ્લુ પી ટી ની ધૂમ, સ્વાદમાં ૬૨ ગણો ઉછાળો

ભારતીયો હવે ચાની બાબતમાં ખૂબ સાહસિક બની રહ્યા છે. કાફે અને મોંઘા સ્ટોર્સ પૂરતો મર્યાદિત રહેલો આ ટ્રેન્ડ હવે સામાન્ય ઘરો સુધી પહોંચ્યો છે. 'પીચ ટી' (Peach Tea) ભારતમાં સૌથી ઝડપથી લોકપ્રિય થતો ફ્લેવર બની ગયો છે, જેમાં વાર્ષિક ધોરણે ૬૨ ગણી જંગી વૃદ્ધિ નોંધાઈ છે. આ સિવાય બ્લુ પી ટી (Aparajita Tea), હેલ્ધી કોમ્બુચા, તુલસી ટી અને ગ્રીન ટી જેવા કાર્યાત્મક અને સ્વાસ્થ્યપ્રદ પીણાં તરફ લોકોની રુચિ ઝડપથી વધી રહી છે, જે વૈશ્વિક સ્તરના પ્રભાવને દર્શાવે છે.

પણ, 'આદુવાળી ચા' હજુ પણ છે અસલી કિંગ!

નવા-નવા પ્રયોગો ભલે ગમે તેટલા થાય, પણ ભારતીયોના દિલમાં પરંપરાગત ચાનું સ્થાન કોઈ લઈ શકે તેમ નથી. રાષ્ટ્રીય સ્તરે આજે પણ ટોચની પાંચ લોકપ્રિય ચાની જાતોમાં આદ્રક ચાઈ (આદુવાળી ચા) પ્રથમ નંબરે છે. ત્યારબાદ પ્લેન બ્લેક ટી, ઈલાયચી ટી, ગ્રીન ટી અને મસાલા ચાઈ આવે છે. દેશના દરેક નાના-મોટા શહેરમાં આદુવાળી ચા આજે પણ સૌથી વધુ ઓર્ડર કરાતું સાર્વત્રિક પીણું છે.

ચા પ્રેમીઓનું ક્વિક ફેક્ટ-શીટ:

·         નંબર-૧ શહેર: દેશભરમાં ચાના શોખીનોની યાદીમાં બેંગલુરુ સૌથી મોખરે છે. જ્યારે મુંબઈ બીજા અને હૈદરાબાદ ત્રીજા ક્રમે આવે છે.

·         નાના શહેરોનો ધડાકો: મેટ્રો સિટીઝ ઉપરાંત ભુવનેશ્વર, તિરુવનંતપુરમ અને કોચી જેવા નાના શહેરોમાં પણ ચાનો ક્રેઝ અસામાન્ય રીતે વધી રહ્યો છે.

·         ફેવરિટ ડે: ભારતીયો સૌથી વધુ ચાની ખરીદી રવિવારે કરે છે, ત્યારબાદ શનિવાર અને ગુરુવારનો નંબર આવે છે.