પટના, તા.૨૫: બિહારના પ્રખ્યાત પ્રવાસન સ્થળ મંદાર હિલ (Mandar Hill) ખાતેથી એક અત્યંત શરમજનક અને આંચકાજનક ઘટના સામે આવી છે. અહીં ફરોજનાર એક યુવતી સાથે કેટલાક અસામાજિક તત્વો અને યુવકો દ્વારા જાહેરમાં છેડતી અને ગેરવર્તણૂક કરવામાં આવી હોવાનો વીડિયો સોશિયલ મીડિયા પર વાયરલ થતાં સમગ્ર વિસ્તારમાં ભારે વિરોધ અને આક્રોશનો માહોલ સર્જાયો છે.

સોશિયલ મીડિયા પર વાયરલ થયેલી આ વીડિયો ક્લિપમાં સ્પષ્ટપણે જોઈ શકાય છે કે, મંદાર હિલ વિસ્તારમાં એકલી પડેલી યુવતીને કેટલાક યુવકોએ ઘેરી લીધી હતી. આ લંપટો યુવતીની મર્યાદાનો ભંગ કરીને તેની સાથે બિભત્સ ચેનચાળા અને પજવણી કરી રહ્યા હતા. યુવતી વિનંતી કરતી રહી અને પોતાની જાતને બચાવવાનો પ્રયાસ કરતી રહી, પરંતુ આરોપીઓ સતત તેની સાથે ગેરવર્તણૂક કરતા રહ્યા હતા.

પોલીસે વીડિયોના આધારે તપાસ તેજ કરી

આ વીડિયો વાયરલ થતાં જ સ્થાનિક પોલીસ પ્રશાસન તુરંત હરકતમાં આવ્યું છે. પોલીસ સત્તાવાળાઓએ ઘટનાની ગંભીરતા નોંધ લઈને તપાસ શરૂ કરી દીધી છે. બાંકા જિલ્લાના વરિષ્ઠ પોલીસ અધિકારીઓએ જણાવ્યું હતું કે, વાયરલ વીડિયોના આધારે ઘટનામાં સામેલ યુવકોની ઓળખ કરવાની કામગીરી પૂરજોશમાં ચાલી રહી છે.

પોલીસે અજાણ્યા આરોપીઓ સામે ગુનો નોંધીને તેમની ધરપકડ માટે ખાસ ટીમો રવાના કરી દીધી છે. પોલીસે આશ્વાસન આપ્યું છે કે, મહિલાઓની સુરક્ષા સાથે રમત કરનારા આ લંપટોને ટૂંક સમયમાં ઝડપી પાડીને કડકમાં કડક કાનૂની કાર્યવાહી કરવામાં આવશે. બીજી તરફ, આ ઘટના બાદ પ્રવાસન સ્થળો પર મહિલાઓની સુરક્ષા અને પોલીસ પેટ્રોલિંગ સામે ફરી એકવાર ગંભીર સવાલો ઊભા થયા છે.