બેંગલુરુ : બેંગલુરુમાં ફ્લિપકાર્ટ/મિન્ટ્રાના એક ડિલિવરી એજન્ટે પાર્સલ પહોંચાડવાના બહાને એક મહિલાના ઘરમાં બળજબરીથી ઘૂસીને વોશરૂમનો ઉપયોગ કર્યો અને બહાર નીકળતી વખતે અશ્લીલ ચેષ્ટાઓ કરતા મહિલાએ આ અંગે પોલીસમાં ફરિયાદ નોંધાવી છે.
મહિલાએ ઇન્સ્ટાગ્રામ પર આપેલા અહેવાલ મુજબ, તેણીએ અજાણ્યા વ્યક્તિને ઘરમાં પ્રવેશ આપવાની સ્પષ્ટ ના પાડી હતી અને પાડોશીની મદદ લેવાનું સૂચન કર્યું હતું, પરંતુ ડિલિવરી એજન્ટે તેમની સીમાઓનો અનાદર કરીને બળજબરીથી ફ્લેટમાં પ્રવેશ મેળવ્યો હતો. પોસ્ટ કરાયેલા વિડિયોમાં તે વોશરૂમમાંથી બહાર આવતો અને મહિલા સામે પોતાના ગુપ્ત ભાગો ખુલ્લા કરતો જોઈ શકાય છે. આ ઘટનાથી ભયભીત બનેલી મહિલાએ પોતાનો ફોન કેમેરો ચાલુ રાખીને હિંમતપૂર્વક તેને રોકવાનો પ્રયાસ કર્યો હતો.
પોતાના જ ઘરમાં અસુરક્ષિત અને અપમાનિત અનુભવતી મહિલાએ આઘાત સાથે જણાવ્યું હતું કે, કોઈને પણ સ્ત્રીની સંમતિ વગર તેની અંગત જગ્યામાં પ્રવેશવાનો કોઈ અધિકાર નથી. આ ઘટના બાદ મહિલાએ સોશિયલ મીડિયા પર પોતાની વ્યથા ઠાલવી હતી, જેને પગલે ડિલિવરી કંપનીઓ અને તેમના કર્મચારીઓની સુરક્ષા વ્યવસ્થા સામે ગંભીર સવાલો ઉભા થયા છે.
આ કિસ્સાએ શહેરી વિસ્તારોમાં રહેતી એકલવાઈ મહિલાઓની સુરક્ષા અંગે ચિંતા વધારી દીધી છે. પોલીસ આ મામલાની તપાસ કરી રહી છે અને આરોપીની ઓળખ કરી આગળની કાયદાકીય કાર્યવાહી હાથ ધરી છે, જ્યારે કંપની દ્વારા પણ આ ઘટનાને ગંભીરતાથી લઈને તપાસની ખાતરી આપવામાં આવી છે.