મુંબઈ : દેશના અગત્યના અને સંવેદનશીલ મુદ્દાઓ પર હંમેશાં બેબાકપણે પોતાનો અવાજ બુલંદ કરનારા બોલિવૂડના સિનિયર એક્ટ્રેસ શબાના આઝમી આ વખતે મતદાર યાદીમાંથી નાગરિકોના નામો ગાયબ થવાના ગંભીર મુદ્દે ચર્ચામાં આવ્યા છે. ચૂંટણી પંચની 'સ્પેશિયલ ઈન્ટેન્સિવ રિવિઝન' (SIR) પ્રક્રિયા બાદ અચાનક જ અનેક મતદાતાઓના નામ મતદાર યાદીમાંથી ગાયબ થઈ જતાં શબાના આઝમીએ મૌન તોડ્યું છે. સોશિયલ મીડિયા પર એક વિશેષ વીડિયો મેસેજ પોસ્ટ કરીને તેમણે આ મામલે ઊંડી ચિંતા વ્યક્ત કરી છે અને તમામ નાગરિકોને પોતાના લોકતાંત્રિક અધિકારો માટે આગળ આવવા આહ્વાન કર્યું છે.

'શું થશે જ્યારે તમારો મત જ ગાયબ થઈ જશે?'

ઈન્સ્ટાગ્રામ પર વીડિયો પોસ્ટ કરતાં શબાના આઝમીએ લખ્યું હતું કે, "તમારો મત તમારો અધિકાર છે અને તમારો અવાજ છે. પરંતુ શું થશે જ્યારે મતદાર યાદીમાંથી તમારું નામ જ અચાનક ગાયબ થઈ જાય? જ્યારે તમારો મત ગણતરીમાં જ ન લેવાય અથવા તેમાં ચેડાં કરવામાં આવે ત્યારે શું કરવું?" તેમણે સ્પષ્ટપણે જણાવ્યું હતું કે આ મુદ્દો કોઈ એક ચોક્કસ રાજકીય પક્ષ પૂરતો મર્યાદિત નથી, પરંતુ દેશના દરેક નાગરિકના મતાધિકાર અને ખુદ લોકશાહીના રક્ષણ સાથે જોડાયેલો છે.

પ્રદર્શન માટે મંજૂરી ન મળતાં જનતાને હાકલ કરી

મુંબઈના ઐતિહાસિક શિવાજી પાર્ક ખાતે શુક્રવારે યોજાનારા શાંતિપૂર્ણ વિરોધ પ્રદર્શન અંગે વાત કરતાં એક્ટ્રેસે નિરાશા વ્યક્ત કરી હતી કે પ્રશાસન પાસે વારંવાર માગણી કરવા છતાં વિરોધ પ્રદર્શન માટે મંજૂરી આપવામાં આવી નહોતી. તેમણે લોકોને અપીલ કરતાં કહ્યું, "સવાલ પૂછવો એ આપણો બંધારણીય અને લોકતાંત્રિક હક છે. એટલા માટે પોતાના ઘરેથી બહાર નીકળો, સવાલ પૂછો, અવાજ ઊઠાવો અને પોતાના મતાધિકારની રક્ષા માટે આગળ આવો."

સોશિયલ મીડિયા પર વીડિયો વાયરલ

શબાના આઝમીના આ વીડિયોને સોશિયલ મીડિયા પર ભારે પ્રતિસાદ મળ્યો છે અને ટૂંક જ સમયમાં ૨ લાખથી વધુ લાઈક્સ મળી ચૂકી છે. સોશિયલ મીડિયા પ્લેટફોર્મ પર પણ 'ધ વાયર' સહિતના અનેક માધ્યમો દ્વારા તેમનો આ મેસેજ શેર કરવામાં આવ્યો છે. દેશના સામાજિક અને રાજકીય મુદ્દાઓ પર બોલિવૂડ હસ્તીઓ દ્વારા અવાજ ઉઠાવવાની આ પરંપરામાં શબાના આઝમીનો આ નવો અવાજ હવે મોટા વિવાદ અને ચર્ચાનું કેન્દ્ર બન્યો છે.