લાહોર : પાકિસ્તાનની ભૂતપૂર્વ કેપ્ટન સના મીરે મહિલા T20 વર્લ્ડ કપમાં ટીમની નબળી કામગીરી બાદ ચાહકો અને ટીકાકારો દ્વારા કરવામાં આવી રહેલી લૈંગિકવાદી ટિપ્પણીઓનો સખત વિરોધ કર્યો છે. નેધરલેન્ડ્સ સામે જીત સાથે વર્લ્ડ કપ પૂર્ણ કરનાર પાકિસ્તાની ટીમ પર નિશાન સાધતા ટીકાકારોએ સોશિયલ મીડિયા પર મહિલા ખેલાડીઓને અપમાનિત કરી હતી, જેના જવાબમાં સના મીરે સ્પષ્ટ કર્યું છે કે ક્રિકેટના પ્રદર્શનને લિંગના આધારે જોવાનું બંધ થવું જોઈએ.

સના મીરે એક ઈન્ટરવ્યુમાં સવાલ કર્યો હતો કે, જ્યારે પુરુષ ટીમ ખરાબ પ્રદર્શન કરે છે ત્યારે શું કોઈ તેમને 'રસોડામાં જઈને રોટલી બનાવવાની' સલાહ આપે છે? તેમણે ટીમની હાર સ્વીકારવા સાથે ટીકાના સ્વર સામે વાંધો ઉઠાવ્યો છે. સનાના મતે, મહિલા ખેલાડીઓએ પાકિસ્તાનમાં વ્યાવસાયિક ક્રિકેટમાં આવવા માટે અનેક સામાજિક અવરોધો પાર કર્યા છે, પરંતુ તેમના પ્રદર્શનને ક્રિકેટના માપદંડોને બદલે લિંગના પૂર્વગ્રહ સાથે મૂલવવામાં આવે છે તે દુર્ભાગ્યપૂર્ણ છે.

વધુમાં, સનાએ કેટલાક અસામાજિક તત્વો દ્વારા AI-જનરેટેડ વીડિયો બનાવી મહિલા ખેલાડીઓની મજાક ઉડાવવા અને તેમના પરિવારોને માનસિક વેદના આપવાની ઘટનાની આકરી ટીકા કરી છે. તેમણે ભારપૂર્વક કહ્યું કે જ્યાં સુધી પાકિસ્તાનમાં મહિલા ક્રિકેટ પ્રત્યેની માનસિકતા નહીં બદલાય ત્યાં સુધી ટીમ પ્રોગ્રેસ કરી શકશે નહીં. તેમણે સ્થાનિક ટુર્નામેન્ટમાં સ્પર્ધા વધારવા અને પ્રતિભાના પૂલને વિસ્તૃત કરવાની જરૂરિયાત પર પણ ભાર મૂક્યો છે.

પાકિસ્તાની મહિલા ક્રિકેટ માટે હવે ખેલાડીઓની માનસિકતા મજબૂત કરવા અને પ્રોફેશનલ માળખું સુધારવા પર ધ્યાન આપવું અનિવાર્ય બન્યું છે. સના મીરના આ નિવેદન બાદ હવે પાકિસ્તાન ક્રિકેટ બોર્ડ અને અન્ય રમતગમતના જાણકારો મહિલા ક્રિકેટને પ્રોત્સાહન આપવા અને ખેલાડીઓને સુરક્ષિત વાતાવરણ પૂરું પાડવા માટે કોઈ નક્કર પગલાં લેશે કે કેમ, તે જોવું રહ્યું.