ઈમ્ફાલ : મણિપુરની રાજધાની ઈમ્ફાલમાંથી એક ચિંતાજનક સમાચાર સામે આવ્યા છે, જ્યાં ભોજનમાં ઝેર ભળવાના કારણે (ફૂડ પોઈઝનિંગ) બોર્ડર સિક્યોરિટી ફોર્સ (BSF) ના ૭૫ જવાનો સહિત અન્ય ત્રણ નાગરિકોની તબિયત અચાનક લથડી ગઈ હતી. ગુરુવારે બપોરના સમયે ઘટેલી આ ઘટના બાદ તમામ અસરગ્રસ્તોને યુદ્ધના ધોરણે સારવાર અર્થે સ્થાનિક હોસ્પિટલમાં ખસેડવામાં આવ્યા હતા.

મળતી વિગતો મુજબ, ઈમ્ફાલના લામશાંગ વિસ્તારમાં તૈનાત BSFની ૫૮મી બટાલિયનના જવાનો અને ત્રણ સ્થાનિક નાગરિકોએ બપોરના સમયે નાસ્તામાં પૂરી-શાક આરોગ્યું હતું. નાસ્તો કર્યાના થોડા જ સમય બાદ એક પછી એક જવાનોને સતત ઊલટીઓ અને પેટમાં અસહ્ય દુખાવાની ફરિયાદો થવા લાગી હતી. સ્થિતિ ગંભીર બનતા તુરંત જ તબીબી ટીમને જાણ કરવામાં આવી હતી અને તમામ લોકોને પ્રાદેશિક તબીબી વિજ્ઞાન સંસ્થાન (RIMS) ખાતે ખસેડવામાં આવ્યા હતા.

હોસ્પિટલના તબીબો દ્વારા ઈમરજન્સી વોર્ડમાં તમામ જવાનો અને નાગરિકોની તાત્કાલિક સારવાર શરૂ કરી દેવામાં આવી હતી. તબીબી વડાના જણાવ્યા મુજબ, સમયસર સારવાર મળી જવાના કારણે હાલમાં તમામ લોકોની સ્થિતિ ભયમુક્ત અને સ્થિર છે તથા તેઓ ઝડપથી રિકવર થઈ રહ્યા છે.

આ ઘટનાને પગલે સૈન્ય પ્રશાસન અને સ્થાનિક તંત્ર હરકતમાં આવ્યું છે. ઈમ્ફાલ સહિત આસપાસના વિસ્તારમાં સ્થિત સૈન્ય યુનિટ્સમાં આપવામાં આવતા ખોરાકની ગુણવત્તાની તપાસ વધારી દેવામાં આવી છે. ભવિષ્યમાં આવી કોઈ ઘટનાનું પુનરાવર્તન ન થાય તે માટે ખોરાકના સેમ્પલ લઈને લેબોરેટરીમાં મોકલવામાં આવ્યા છે અને સૈન્ય વિભાગ દ્વારા જરૂરી સુરક્ષા પગલાં લેવામાં આવી રહ્યા છે.