પુણે : મહારાષ્ટ્રના પુણે શહેરમાં ‘બિગ બોસ મરાઠી’ અને સોશિયલ મીડિયા રીલ્સથી લોકપ્રિય બનેલી અભિનેત્રી દિવ્યા શિંદે સામે એક ૬૫ વર્ષીય ભૂતપૂર્વ સરકારી ડૉક્ટર દ્વારા ૫ લાખ રૂપિયાની ખંડણી માંગવા, ધમકી આપવા, ઘરમાં બળજબરીથી ઘૂસીને મારપીટ કરવા અને તોડફોડ કરવા જેવા ગંભીર આરોપો સાથે પોલીસ કેસ નોંધવામાં આવ્યો છે, જેના પગલે ભારે ચર્ચા જાગી છે.

ફરિયાદી ડૉ. વિદ્યાધર ગાયકવાડ, જેઓ પુણે કેન્ટોનમેન્ટ હોસ્પિટલમાંથી CMO તરીકે નિવૃત્ત થયા છે અને હાલ ‘કરુણાદીપ ફાઉન્ડેશન’ સાથે જોડાયેલા છે, તેમણે આરોપ મૂક્યો છે કે દિવ્યા શિંદે ઓગસ્ટ મહિનાથી કાર્યક્રમના પ્રમોશનના નામે ફોન અને મેસેજ કરીને ૫ લાખની માંગણી કરી રહી હતી, જોકે સંસ્થા દ્વારા તેમને કોઈ સત્તાવાર જવાબદારી સોંપવામાં આવી નહોતી. આ મામલે ૧૭ સપ્ટેમ્બરે ડૉક્ટરના ઘરે જઈને પરિવાર પર દબાણ લાવવામાં આવ્યું હતું અને ૨૩ સપ્ટેમ્બરે અન્ના ધામધેરે દ્વારા હોટેલ બ્લુ નાઈન ખાતે બોલાવીને રકમ ન ચૂકવાય તો મારપીટ કરવાની ધમકી આપવામાં આવી હોવાનો દાવો કરાયો છે.

આ વિવાદ વધુ ઉગ્ર ત્યારે બન્યો જ્યારે ૨૪ સપ્ટેમ્બરની રાત્રે અન્ના ધામધેરે અને દિવ્યા શિંદે સહિત ૮ થી ૧૦ લોકોનું ટોળું ડૉક્ટરના ઘરે બળજબરીથી ઘૂસી ગયું હતું અને લકવાના દર્દી હોવાની વિનંતી છતાં ચહેરા, પેટ તેમજ પીઠ પર લાકડીઓ અને લોખંડના વાસણો વડે લાત-મુક્કાથી ક્રૂરતાપૂર્વક મારપીટ કરી હતી, તેમજ કાર લઈ જવાનો પ્રયાસ કરી જાનથી મારી નાખવાની ધમકી આપી હતી.

ઘટના બાદ ઈજાગ્રસ્ત ડૉક્ટરને પુણેની સસૂન હોસ્પિટલમાં સારવાર અર્થે દાખલ કરવામાં આવ્યા છે, અને કાલેપડલ પોલીસ સ્ટેશન દ્વારા દિવ્યા શિંદે તથા અન્ના ધામધેરે સહિતના આરોપીઓ વિરુદ્ધ ભારતીય ન્યાય સંહિતાની વિવિધ કલમો હેઠળ એફઆઈઆર નોંધીને આસિસ્ટન્ટ પોલીસ ઈન્સ્પેક્ટર અમિત શેટે દ્વારા સઘન તપાસ હાથ ધરવામાં આવી છે, જેમાં પોલીસ ટૂંક સમયમાં જ તમામ સાક્ષીઓ અને પુરાવાઓના આધારે કાનૂની કાર્યવાહી આગળ વધારશે.