થાણે : મહારાષ્ટ્રના થાણે જિલ્લામાં આવેલી શાસ્ત્રી નગર હોસ્પિટલમાં ડોક્ટરો અને મેડિકલ સ્ટાફ પર થયેલા હુમલાના હાઈ-પ્રોફાઈલ કેસમાં કાયદાકીય કાર્યવાહીએ વેગ પકડ્યો છે. આ કેસમાં પોલીસે ૧,૮૩૨ પાનાંનું દળદાર આરોપનામું (ચાર્જશીટ) રજૂ કર્યા બાદ, મુખ્ય આરોપી અને કલ્યાણ-ડોંબિવલી મ્યુનિસિપલ કોર્પોરેશનના શિવસેના નગરસેવક રમેશ મ્હાત્રે શુક્રવારે કલ્યાણ ડિસ્ટ્રિક્ટ એન્ડ સેશન્સ કોર્ટમાં હાજર થયા હતા. મોઢા પર માસ્ક પહેરીને કોર્ટમાં પહોંચેલા નગરસેવકે પોતાની સામે ઘડવામાં આવેલા તમામ ગંભીર આરોપોને મક્કમતાથી ફગાવી દીધા હતા.

આ ઘટના ૬ ઓગસ્ટના રોજ બની હતી, જ્યારે એક મહિલા દર્દીની સારવારમાં વિલંબ થયો હોવાના આક્ષેપ સાથે રમેશ મ્હાત્રે અને તેમના સમર્થકો હોસ્પિટલમાં એકઠા થયા હતા. તબીબો સાથે ઉગ્ર બોલાચાલી બાદ મામલો મારામારી સુધી પહોંચ્યો હતો અને ડોક્ટરો પર હુમલો કરવામાં આવ્યો હતો. ડેપ્યુટી પોલીસ કમિશનર અતુલ ઝેન્ડે અને વિશેષ સરકારી વકીલ પ્રકાશ સાલસિંગીકર દ્વારા કોર્ટમાં રજૂ કરાયેલા આ ચાર્જશીટમાં રમેશ મ્હાત્રે ઉપરાંત રમેશ પવાર, પ્રમોદ નિકમ, અક્ષય કારાન્ડે અને સાધના કારાન્ડેને પણ સહ-આરોપી દર્શાવવામાં આવ્યા છે. પોલીસ પાસે ડોક્ટરો, નર્સ, સ્ટાફ અને સીસીટીવી કોન્ટ્રેક્ટરોના મહત્ત્વના નિવેદનો સહિતના મજબૂત પુરાવા છે.

જુડિશિયલ મેજિસ્ટ્રેટ ફર્સ્ટ ક્લાસ નીલેશ વસાદેની અદાલતમાં કાર્યવાહી દરમિયાન ભારતીય ન્યાય સંહિતા (BNS) ની સંબંધિત કલમો હેઠળ આરોપીઓ સામે ઔપચારિક રીતે આરોપો ઘડવામાં આવ્યા હતા. જોકે, મ્હાત્રે અને હાજર રહેલા સહ-આરોપીઓએ પોતાને નિર્દોષ ગણાવીને આરોપો નકાર્યા હતા. આ કેસમાં અન્ય સહ-આરોપી સાધના કારાન્ડે હાલ આધારવાડી જેલમાં જુડિશિયલ કસ્ટડી હેઠળ છે. આરોગ્ય કર્મચારીઓ પરના હુમલા અંગે પોલીસની આ કડક કાર્યવાહી સમગ્ર વિસ્તારમાં ચર્ચાનો વિષય બની છે.