બીડ, તા.૨૪: મહારાષ્ટ્રના બીડ જિલ્લામાં સાયબર ગુનાખોરીની એક ચોંકાવનારી અને આંખો ઉઘાડનારી ઘટના સામે આવી છે, જેમાં ઉચ્ચ સત્તાધીશો પણ સાયબર ઠગાઈનો ભોગ બન્યા છે. મજલગાંવના સબ-ડિવિઝનલ ઓફિસર (SDO) ગૌરવ સાહેબરાવ ઈંગોલે સાથે એક સાયબર શાતિરે જિલ્લા કલેક્ટરની ગાડીનો ભયાનક અકસ્માત થયો હોવાની અને તેમના પુત્રને ગંભીર ઈજાઓ પહોંચી હોવાની ખોટી વાતો કહીને ₹૩૦,૦૦૦ની છેતરપિંડી આચરી છે. આ મામલે મજલગાંવ ગ્રામીણ પોલીસ સ્ટેશનમાં અજાણ્યા શખ્સ વિરુદ્ધ ગુનો નોંધાયો છે.

મળતી માહિતી મુજબ, રવિવારે બપોરે SDO ગૌરવ ઈંગોલેના મોબાઈલ પર એક અજાણ્યા નંબર પરથી ફોન આવ્યો હતો. ફોન કરનારે પોતાની ઓળખ પૂર્વ મંત્રી ધનંજય મુંડેના અંગત સહાયક (PA) "જોશી" તરીકે આપી હતી. તેણે અત્યંત ગભરાયેલા અવાજે ઈંગોલેને જણાવ્યું કે મુંબઈના જિલ્લા કલેક્ટર સૌરભ કટિયારની ગાડીનો વડવાણી નજીક ગંભીર અકસ્માત થયો છે અને અકસ્માતમાં કલેક્ટરના પુત્રને આઈસીયુમાં દાખલ કરવો પડ્યો છે. સારવાર માટે તાત્કાલિક નાણાંની જરૂર હોવાનું કહી તેણે ઈમરજન્સી ઊભી કરી હતી.

કલેક્ટર અને તેમના પરિવારના જીવનો સવાલ હોવાથી ઈંગોલેએ ક્ષણનો પણ વિલંબ કર્યા વગર ઠગની વાત પર વિશ્વાસ કરી લીધો હતો. આરોપીએ મોકલેલા QR કોડ પર ઈંગોલેએ પોતાના ભાઈ અમિત પૈકરરાવના બેંક ખાતામાંથી બે હપ્તામાં કુલ ₹૩૦,૦૦૦ ટ્રાન્સફર કરી દીધા હતા. જોકે, પૈસા મોકલ્યા બાદ ઈંગોલેને શંકા જતાં તેમણે બનાવની ખરાઈ કરવા બીડના કલેક્ટર વિવેક જોહ્ન્સનનો સીધો સંપર્ક કર્યો હતો. ત્યારે જાણવા મળ્યું કે આવો કોઈ અકસ્માત થયો જ નથી અને તેઓ સાયબર ઠગાઈનો ભોગ બન્યા છે.

પોતાની સાથે છેતરપિંડી થઈ હોવાનો અહેસાસ થતાં જ SDO ગૌરવ ઈંગોલેએ મજલગાંવ ગ્રામીણ પોલીસ સ્ટેશનમાં ફરિયાદ નોંધાવી હતી. પોલીસે ભારતીય ન્યાય સંહિતા (BNS) ની સંબંધિત કલમો હેઠળ અજાણ્યા ગુનેગાર સામે કેસ નોંધી તપાસ હાથ ધરી છે. તપાસ અધિકારી અને સાયબર સેલની ટીમ આરોપીના મોબાઈલ નંબર, QR કોડ અને બેંક ટ્રાન્ઝેક્શન વિગતોના આધારે શાતિર ઠગનું લોકેશન શોધવા ચક્રો ગતિમાન કર્યા છે.