બારામતી : મહારાષ્ટ્રમાં કાયદો અને વ્યવસ્થાની સ્થિતિને ગંભીર પડકાર આપતી એક મોટી ઘટના સામે આવી છે. રાજ્યના જાણીતા અને કરોડોનું ટર્નઓવર ધરાવતી 'રાણા શિપિંગ કંપની'ના માલિક તથા યુવાન ઉદ્યોગપતિ રાણા સૂર્યવંશી પર બારામતી નજીક અજ્ઞાત હુમલાખોરો દ્વારા જીવલેણ ગોળીબાર કરવામાં આવ્યો છે. આ હુમલામાં સૂર્યવંશીના હાથમાં ઈજા થઈ છે અને તેમને તાત્કાલિક ધોરણે પુણેની એક ખાનગી હોસ્પિટલમાં દાખલ કરવામાં આવ્યા છે, જ્યાં તેમની સારવાર ચાલી રહી છે. સદ્નસીબે આ ભયાનક હુમલામાં તેમનો આબાદ બચાવ થયો છે.

પ્રાપ્ત વિગતો અનુસાર, રવિવારે સાંજે અંદાજે સાડા સાત વાગ્યાના સુમારે રાણા સૂર્યવંશી દૌંડ તરફ જઈ રહ્યા હતા. રસ્તામાં બારામતી તાલુકાના ગોજુબાવી વિસ્તારમાં એક જમીનનો પ્લોટ જોવા માટે તેઓ રોકાયા હતા. આ દરમિયાન કેટલાક શખસો બુકે (ફૂલદસ્તો) આપવાના બહાને તેમની નજીક આવ્યા હતા અને અચાનક તેમના પર ગોળીબાર શરૂ કરી દીધો હતો. અગાઉ પણ સોલાપુર જિલ્લામાં તેમના પર હુમલો થયો હોવાનું સામે આવ્યું છે, જેના કારણે આ હુમલો પૂર્વ આયોજિત કાવતરાનો ભાગ હોવાની આશંકા વ્યક્ત કરવામાં આવી રહી છે.

સૌથી મોટો સવાલ એ ઉભો થઈ રહ્યો છે કે રાણા સૂર્યવંશીને સરકાર તરફથી 'વાય-પ્લસ' (Y+) શ્રેણીની સુરક્ષા મળેલી છે, છતાં આ ઘટના વખતે તેમની સાથે સરકારી સુરક્ષા જવાનો હાજર નહોતા અને માત્ર ખાનગી અંગરક્ષકો જ તેમની સાથે હતા. ઘટનાની ગંભીરતાને જોતાં રાજ્યના ગૃહમંત્રી દેવેન્દ્ર ફડણવીસે નિવેદન આપતા જણાવ્યું છે કે, હુમલો થયો ત્યારે ઉદ્યોગપતિ સાથે સરકારી સુરક્ષા કવચ હાજર નહોતું અને આ સમગ્ર મામલે ઉચ્ચ સ્તરીય તપાસ હાથ ધરીને ટૂંક સમયમાં તમામ વિગતો બહાર લાવવામાં આવશે. પોલીસે અજાણ્યા હુમલાખોરોની શોધખોળ શરૂ કરી દીધી છે.