પટના, તા. ૧૫: કેન્દ્ર સરકાર દ્વારા સુરક્ષા અને વહીવટી તંત્રમાં એક મોટો ફેરફાર કરતા બિહાર કેડરના ૧૯૯૩ બેચના વરિષ્ઠ આઈએએસ (IPS) અધિકારી જિતેન્દ્ર કુમારને રેલવે પ્રોટેક્શન ફોર્સ (RPF) ના નવા ડાયરેક્ટર જનરલ (DG) તરીકે નિયુક્ત કરવામાં આવ્યા છે. કેન્દ્ર સરકાર દ્વારા આ અંગેનો સત્તાવાર આદેશ જારી કરી દેવામાં આવ્યો છે. તેઓ વર્તમાન ડીજી સોનાલી મિશ્રાનું સ્થાન સંભાળશે, જેમનો કાર્યકાળ આગામી ૩૧ ઓક્ટોબર, ૨૦૨૬ ના રોજ પૂર્ણ થઈ રહ્યો છે. જિતેન્દ્ર કુમાર આ પદ પર ૩૧ માર્ચ, ૨૦૩૦ સુધી અથવા આગામી આદેશો સુધી સેવા આપશે.

નવા આરપીએફ ડીજી તરીકે નિયુક્ત થનાર જિતેન્દ્ર કુમાર પાસે પોલીસિંગ અને કાયદો વ્યવસ્થાનો લાંબો અને સમૃદ્ધ ૩૩ વર્ષનો અનુભવ ધરાવે છે. મૂળ ઉત્તર પ્રદેશના વતની એવા જિતેન્દ્ર કુમારે પોતાની આ લાંબી કારકિર્દી દરમિયાન બિહાર પોલીસ મુખ્યાલય તેમજ ગુના તપાસ વિભાગ (CID) માં એડિશનલ ડિરેક્ટર જનરલ (ADG) તરીકે પણ ઉત્કૃષ્ટ સેવાઓ આપી છે. ગત વર્ષે જ તેમને ડીજી પદ પર બઢતી આપવામાં આવી હતી, અને હવે તેમને કેન્દ્ર સરકાર દ્વારા આ મોટી જવાબદારી સોંપવામાં આવી છે.

આ કેન્દ્રીય નિમણૂક પહેલાં જિતેન્દ્ર કુમાર બિહારમાં એકસાથે ત્રણ મહત્વપૂર્ણ પદોની જવાબદારી સંભાળી રહ્યા હતા. તેઓ હાલમાં બિહાર પોલીસના સેન્ટ્રલ સિલેક્શન બોર્ડ (કોન્સ્ટેબલ રિક્રુટમેન્ટ) ના અધ્યક્ષ તરીકે કાર્યરત છે અને તેમની પાસે બિહાર સ્પેશિયલ આર્મ્ડ પોલીસ (BSAP) ના ડાયરેક્ટર જનરલનો વધારાનો હવાલો પણ હતો. આ ઉપરાંત, બિહાર પોલીસ સબઓર્ડિનેટ સર્વિસીસ કમિશનના અધ્યક્ષ કે.એસ. દ્વિવેદીના રજા પર જવાથી રાજ્ય સરકારે તેમને તે પદનો કાર્યભાર પણ સોંપ્યો હતો.

આગામી સમયમાં તેઓ કેન્દ્રમાં રેલવે સુરક્ષા દળ (RPF) ની કમાન સંભાળશે. દેશભરના રેલવે મુસાફરોની સુરક્ષા, રેલવે સંપત્તિનું રક્ષણ અને સુરક્ષા દળોના આધુનિકીકરણમાં તેમના આ લાંબા વહીવટી અને પોલીસ અનુભવનો મોટો ફાયદો મળશે તેવી અપેક્ષા વ્યક્ત કરવામાં આવી રહી છે.