વોટ્સએપ પર વીડિયો મોકલવો પબ્લિક વ્યૂ ગણાયઃ આરોપીના જામીન નકાર્યા
બોમ્બે હાઈકોર્ટે વોટ્સએપ પર SC/ST સમુદાયના વ્યક્તિનો વાંધાજનક વીડિયો શેર કરવાને જાહેર દ્રષ્ટિ ગણાવ્યો : નાગપુર બેન્ચે આરોપી નિખિલ થેપાલેની આગોતરા જામીન અરજી ફગાવી સ્પષ્ટ કર્યું કે ડિજિટલ પ્લેટફોર્મ પર શેર કરાયેલી સામગ્રી જાહેર જ ગણાશે. કાયદાની કલમ ૭૭, ૭૮ અને SC/ST એક્ટ હેઠળ ગુનો નોંધી, હાઈકોર્ટે ડિજિટલ અપરાધો સામે કડક વલણ અપનાવ્યું છે
મુંબઇ તા.૨: સોશિયલ મીડિયા કે વ્હોટ્સએપ પર કોઈને વ્યક્તિગત કે ખાનગી રીતે આપત્તિજનક ફોટો કે વીડિયો મોકલવાથી હવે કાયદાની નજરોથી બચી નહી શકાય, બોમ્બે હાઈકોર્ટનો આ નવો ચુકાદો તમારી આંખો ખોલી નાખશે. બોમ્બે હાઈકોર્ટની નાગપુર બેન્ચે એક મહત્ત્વપૂર્ણ કેસની સુનાવણી કરતા સ્પષ્ટ કર્યું છે કે એસસી (SC) કે એસટી (ST) સમુદાયથી સંબંધિત કોઈ વ્યક્તિની આપત્તિજનક તસવીર કે વીડિયો વ્હોટ્સએપ જેવા ડિજિટલ પ્લેટફોર્મ પર શેર કે પ્રસારિત કરવા એ કાયદાકીય રીતે પબ્લિક વ્યૂ (જાહેર નજર) હેઠળ આવે છે. આવા ગંભીર મામલામાં એસસી/એસટી એટ્રોસિટી એક્ટની કડક જોગવાઈઓ લાગુ પડે છે.
આ મામલો નિખીલ થેપાલે નામના આરોપીની આગોતરા જામીન અરજી સાથે જોડાયેલો છે. પીડિતા મહિલા એસસી/એસટી સમુદાયમાંથી આવે છે. આરોપીએ તેની પાસે ગેરકાયદેસર અને યૌન ઈચ્છાઓ પૂરી કરવાની માંગણી કરી હતી. જ્યારે મહિલાએ આ વાતનો ઇનકાર કર્યો, ત્યારે આરોપીએ પીડિતાના આપત્તિજનક વીડિયો અને ફોટોગ્રાફસ રેકોર્ડ કરી લીધા હતા. બદઈરાદાથી આરોપીએ આ તમામ સામગ્રી પીડિતાના પતિ, નણંદ અને અન્ય સગા-સંબંધીઓના વ્હોટ્સએપ નંબર પર મોકલી આપી હતી, જેને લઈને તેની સામે કડક ગુનો નોંધવામાં આવ્યો હતો.
આ સમગ્ર પ્રકરણમાં આરોપી સામે ભારતીય ન્યાય સંહિતા (BNS)ની કલમ ૭૭ (વોયુરિઝમ) અને કલમ ૭૮ (સ્ટોકિગ), આઈટી એક્ટ (IT Act)ની કલમ ૬૬(e) અને ૬૭ તેમજ એસસી/એસટી એક્ટની ગંભીર ધારાઓ હેઠળ એફઆઈઆર દાખલ કરવામાં આવી હતી. આ કેસમાં ૫ નવેમ્બર, ૨૦૨૫ના રોજ ગુનો નોંધાયા બાદથી જ આરોપી ફરાર હતો.
કોર્ટમાં આરોપીના વકીલે એવો બચાવ કર્યો હતો કે વ્હોટ્સએપ જેવા પર્સનલ મેસેજિગ પ્લેટફોર્મ પર ફોટો કે વીડિયો મોકલવો એ બે વ્યક્તિઓ કે મર્યાદિત લોકો વચ્ચેની વાત છે, તેથી તેને પબ્લિક વ્યૂ ગણી શકાય નહીં. જો કે, બોમ્બે હાઈકોર્ટના જાસ્ટિસ યનશિવરાજ ખોબ્રાગડેની સિગલ બેન્ચે આ તર્કને સંપૂર્ણપણે ફગાવી દીધો હતો. કોર્ટે સ્પષ્ટ કર્યું કે ડિજિટલ પ્લેટફોર્મ પર કોઈ સામગ્રી શેર કરવાથી તે અન્ય લોકોની નજરમાં આવે છે, જે એસસી/એસટી એક્ટ હેઠળના અપરાધના તમામ આવશ્યક તત્વોને પૂર્ણ કરે છે.
કોર્ટે નોંધ્યું કે આરોપી લાંબા સમયથી ફરાર છે અને વિશેષ અદાલત દ્વારા પણ તેની જામીન અરજીઓ અગાઉ ફગાવી દેવામાં આવી ચૂકી છે, જેથી તે જામીન મેળવવાને પાત્ર નથી. આ મહત્ત્વપૂર્ણ ચુકાદાથી એ સ્પષ્ટ થઈ ગયું છે કે ડિજિટલ યુગમાં માત્ર ભૌતિક સ્થળો જ નહીં, પરંતુ ઇન્ટરનેટ અને સોશિયલ મીડિયા જેવા પ્લેટફોર્મ પર કરવામાં આવતું ઉત્પીડન કે અપમાન પણ કાયદાની નજરમાં જાહેર ગુનો બને છે અને દોષિતો સામે કાયદાનો સકંજો વધુ મજબૂત થયો છે.
(2:59 PM IST)
છેલ્લા 8 દિવસમાં સૌથી લોકપ્રિય 
