લખનૌ : ઉત્તર પ્રદેશના મુખ્યમંત્રી યોગી આદિત્યનાથે આજે લખનૌમાં એક કાર્યક્રમ દરમિયાન રાષ્ટ્રીય સુરક્ષા અને અહિંસાના સિદ્ધાંતો અંગે અત્યંત મહત્વનું નિવેદન આપ્યું છે. નૌસેના શૌર્ય વાટિકાના ઉદ્ઘાટન પ્રસંગે સંબોધન કરતા સીએમ યોગીએ જણાવ્યું હતું કે, "અહિંસા એ માનવતાનો સર્વોચ્ચ ધર્મ છે, પરંતુ જ્યારે દેશ અને સમાજ માટે કોઈ વ્યક્તિ ખતરો બની જાય, ત્યારે અહિંસા કામ કરી શકતી નથી. આવી પરિસ્થિતિમાં હિંસા (બળનો પ્રયોગ) જરૂરી બની જાય છે."

'અહિંસા પરમો ધર્મ:, ધર્મ હિંસા તથૈવ ચ'

મુખ્યમંત્રીએ પૌરાણિક સંદર્ભ ટાંકતા સ્પષ્ટ કર્યું કે ન્યાય અને રાષ્ટ્રની રક્ષા માટે બળનો પ્રયોગ કરવો એ અનૈતિક નથી, પરંતુ તે સમયની માંગ છે. તેમણે રાષ્ટ્રની શક્તિને વિશ્વમાં તેના સ્થાન સાથે સાંકળતા કહ્યું કે, "જ્યારે આપણે સુરક્ષાના મોરચે મજબૂત હોઈશું ત્યારે જ વિશ્વ આપણી સાથે મિત્રતા કરશે. જે નબળું છે, તેની સામે કોઈ ઝૂકતું નથી." આ સિદ્ધાંત આપણા સશસ્ત્ર દળોના સંઘર્ષમાં પણ પ્રતિબિંબિત થાય છે, જે રાષ્ટ્રના દુશ્મનો સામે કઠોર વલણ અપનાવે છે.

સુરક્ષિત વાતાવરણમાં જ વિકાસનું ફૂલ ખીલે છે

સીએમ યોગીએ રાજ્યમાં છેલ્લા દાયકામાં આવેલા પરિવર્તનને સુરક્ષા સાથે જોડ્યું હતું. તેમણે જૂના દિવસોને યાદ કરાવતા કહ્યું કે, 2017 પહેલા ઉત્તર પ્રદેશમાં વારંવાર કર્ફ્યુ લાગતા હતા અને માફિયાઓનું રાજ હતું. પરંતુ આજે સુરક્ષિત વાતાવરણને લીધે જ વિકાસ યોજનાઓ સફળતાપૂર્વક આગળ વધી રહી છે. તેમણે નાગરિકોને આહ્વાન કર્યું કે, જેમ સૈનિકો સરહદનું રક્ષણ કરે છે, તેમ નાગરિકોએ પણ સશસ્ત્ર દળો પ્રત્યે આદરની ભાવના રાખવી જોઈએ.

INS ગોમતીની નવી સફર

આ પ્રસંગે સંરક્ષણ પ્રધાન રાજનાથ સિંહની હાજરીમાં 'નૌસેના શૌર્ય વાટિકા'નું લોકાર્પણ થયું હતું. જેમાં નિવૃત્ત યુદ્ધ જહાજ INS ગોમતીને ગોમતી નદીના કિનારે એક સ્મારક તરીકે પ્રસ્થાપિત કરવામાં આવ્યું છે. સીએમ યોગીએ આ સ્મારકને યુવાનો માટે પ્રેરણાદાયી ગણાવ્યું હતું, જે ભારતીય નૌકાદળની વીરતા અને રાષ્ટ્ર નિર્માણના કાર્યોની યાદ અપાવતું રહેશે. આ કાર્યક્રમમાં નાયબ મુખ્યમંત્રી કેશવ પ્રસાદ મૌર્ય અને બ્રજેશ પાઠક પણ ઉપસ્થિત રહ્યા હતા.