​ઈમ્ફાલ: મણિપુર રાજ્યમાં કાયદો અને વ્યવસ્થાની સ્થિતિ વધુ એક વખત ગંભીર બની છે. સેનાપતિ જિલ્લામાં મંગળવારે મોડી રાત્રે આસામ રાઈફલ્સના સૈન્ય કેમ્પ પર એક ઉગ્ર અને હિંસક ટોળાએ અચાનક હુમલો કરી દેતા ખળભળાટ મચી ગયો છે. ગુપ્ત માહિતીના આધારે હાથ ધરવામાં આવેલા એક ઓપરેશનના પગલે સ્થાનિક લોકોમાં ફેલાયેલા રોષને કારણે સ્થિતિ કાબૂ બહાર ગઈ હતી, જેમાં સુરક્ષાદળોના અનેક વાહનોને આગના હવાલે કરી દેવામાં આવ્યા છે.

​ઘટનાક્રમ અંગે પ્રાપ્ત વિગતો મુજબ, સેનાપતિ જિલ્લાના માકુઇલોંગદી વિસ્તારમાં કેટલાક સશસ્ત્ર ઉગ્રવાદીઓ છુપાયા હોવાની ચોક્કસ બાતમી સુરક્ષાદળોને મળી હતી. આ માહિતીના આધારે આસામ રાઈફલ્સની ટીમે વિસ્તારને કોર્ડન કરી ત્વરિત કાર્યવાહી હાથ ધરી હતી. આ વિસ્તાર NSCN (IM) ના ઓકલોંગ સ્થિત નિર્ધારિત કેમ્પથી માત્ર બે કિલોમીટર પશ્ચિમમાં આવેલો છે. ઉગ્રવાદીઓ દ્વારા યુદ્ધવિરામ (સીઝફાયર) કરારનું ઉલ્લંઘન કરી ગણવેશમાં સશસ્ત્ર રીતે ફરી રહ્યા હોવાની ફરિયાદો બાદ સેનાએ આ અભિયાન છેડ્યું હતું.

​સર્ચ ઓપરેશન દરમિયાન, શરૂઆતમાં મોટી સંખ્યામાં સ્થાનિક મહિલાઓ સહિતના લોકો એકત્ર થઈ ગયા હતા અને તેમણે સેનાની કાર્યવાહીમાં અવરોધ ઉભો કરવાનો પ્રયાસ કર્યો હતો. જોકે, રાત્રિના સમયગાળા દરમિયાન મામલો વધુ ગંભીર બન્યો હતો. સેનાપતિ શહેર અને આસપાસના વિસ્તારોમાંથી એકઠું થયેલું હિંસક ટોળું સીધું જ આસામ રાઈફલ્સના કેમ્પ સુધી પહોંચી ગયું હતું.

​ટોળાએ ભારે પથ્થરમારો કરીને કેમ્પમાં તોડફોડ કરી હતી અને સુરક્ષા વ્યવસ્થાને પડકાર ફેંક્યો હતો. આ હુમલામાં સેનાના એક નાના વાહન, બે ટ્રક અને એક નાગરિકની કારને ટોળાએ આગ ચાંપી દીધી હતી. હિંસક ઘટનાની ગંભીરતાને જોતા હાલમાં સેનાપતિ જિલ્લામાં સુરક્ષા વ્યવસ્થા સઘન બનાવવામાં આવી છે અને વધારાના સુરક્ષાદળો તૈનાત કરી દેવામાં આવ્યા છે. આ વિસ્તારમાં હાલ તણાવપૂર્ણ શાંતિ પ્રવર્તી રહી છે અને ઉચ્ચ અધિકારીઓ દ્વારા સમગ્ર સ્થિતિ પર ચાંપતી નજર રાખવામાં આવી રહી છે.