મુંબઈ : મુંબઈના મેયર અને પાલિકા તંત્રને તાજેતરમાં મળેલી એક બોમ્બની ધમકીભરી ઈમેલમાં પંજાબી ગાયક દિલજીત દોસાંજની આગામી ૨૭ નવેમ્બર, ૨૦૨૬ના રોજ મહાલક્ષ્મી રેસકોર્સ ખાતે યોજાનારી કોન્સર્ટ પણ નિશાન પર હોવાનો દાવો કરવામાં આવતા સમગ્ર પોલીસ બેડામાં ચકચાર મચી ગઈ છે.

પ્રાપ્ત વિગતો અનુસાર, ધમકી મળ્યા બાદ સુરક્ષા એજન્સીઓ દ્વારા તાત્કાલિક ધોરણે કોન્સર્ટના સ્થળની ઝીણવટભરી તપાસ કરવામાં આવી હતી, જેમાં હાલ કોઈ શંકાસ્પદ વસ્તુ મળી નથી, છતાં ફેન્સની સુરક્ષાને સર્વોચ્ચ પ્રાથમિકતા આપીને તંત્ર દ્વારા વ્યાપક અને કડક સુરક્ષા વ્યવસ્થા ગોઠવવાનો નિર્ણય લેવામાં આવ્યો છે.

આ સુરક્ષા આયોજન અંતર્ગત સામાન્ય દિવસોમાં રાખવામાં આવતા ત્રણ પ્રવેશદ્વારોને બદલે હવે પાંચ મુખ્ય પ્રવેશદ્વારો પર સઘન તપાસ હાથ ધરવામાં આવશે, તેમજ કાર્યક્રમના દિવસ અને તેના આગલા દિવસે પણ સમગ્ર પરિસર પોલીસના ચુસ્ત પહેરા હેઠળ રહેશે.

દિલ્હીમાં અગાઉ યોજાયેલી કોન્સર્ટના અનુભવમાંથી બોધપાઠ લઈને મુંબઈમાં ખાનગી સુરક્ષાકર્મીઓની સંખ્યા ૪૦૦થી વધારીને ૧,૫૦૦ થી ૨,૦૦૦ સુધીની કરવામાં આવી રહી છે, જેથી ભીડ પર પૂરતું નિયંત્રણ રાખી શકાય.

આ ઉપરાંત, મહાલક્ષ્મી રેસકોર્સની આસપાસના ૫૦૦ થી ૭૦૦ મીટરના વિસ્તારને 'નો-કાર ઝોન' જાહેર કરવા સાથે ટ્રાફિક પર વિશેષ પ્રતિબંધો લાદવામાં આવશે અને ગાયકની સુરક્ષા માટે સાદા વેશમાં પોલીસ જવાનો તૈનાત રહેશે.

આયોજકો અને સુરક્ષા અધિકારીઓ દ્વારા કડક સૂચના આપવામાં આવી છે કે દિલજીતના આગમનનો સમય કે તેઓ જ્યાં રોકાવાના છે તે હોટલની વિગતો ગુપ્ત રાખવામાં આવે, તેમજ કોન્સર્ટમાં આવનાર દરેક દર્શકના ફોન અને સામાનની પણ અત્યંત ઝીણવટપૂર્વક તપાસ કરવામાં આવશે.