મુંબઈ: શનિવાર, ૨ મે ૨૦૨૬ : ભારતીય બજાર નિયામક સેબી (Securities and Exchange Board of India) દ્વારા અલ્ટરનેટિવ ઇન્વેસ્ટમેન્ટ ફંડ્સ (AIF) માટે નવા અને કડક નિયમો લાગુ કરવામાં આવ્યા છે. આ નવા ફાસ્ટ-ટ્રેક મિકેનિઝમનો મુખ્ય ઉદ્દેશ્ય પ્રાઇવેટ પ્લેસમેન્ટ મેમોરેન્ડમ (PPM) પ્રક્રિયાને ઝડપી બનાવવાનો અને ફંડ લોન્ચિંગની પ્રક્રિયાને સરળ બનાવવાનો છે. નવા નિયમો મુજબ, જો સેબી તરફથી કોઈ વાંધો ન આવે તો AIF ફંડ ૩૦ દિવસમાં જ પોતાની નવી સ્કીમ લોન્ચ કરી શકશે અને રોકાણકારોને દસ્તાવેજો મોકલી શકશે.

પ્રક્રિયામાં મોટો ફેરફાર:
અગાઉ આ પ્રક્રિયા અત્યંત જટિલ હતી અને વારંવારની તપાસ તથા સુધારાને કારણે તેમાં ઘણો સમય વ્યય થતો હતો. હવે નવી સ્કીમ લોન્ચ કરવા માટે ફંડને રજિસ્ટ્રેશન મળ્યા બાદ અથવા ૩૦ દિવસ પૂર્ણ થયા પછી જ આગળ વધવાની છૂટ મળશે. જો આ સમયગાળા દરમિયાન સેબી તરફથી કોઈ ટિપ્પણી કે સુધારો સૂચવવામાં આવે, તો તેનો અમલ કરવો અનિવાર્ય રહેશે. આ ઉપરાંત, સેબીએ એક સ્ટાન્ડર્ડ ડિસ્ક્લેમર પણ જાહેર કર્યું છે, જેમાં સ્પષ્ટતા કરવામાં આવી છે કે માત્ર PPM ફાઈલ કરવાનો અર્થ સેબીની મંજૂરી નથી.

સમયમર્યાદા અને જવાબદારી નક્કી કરાઈ:
સેબીએ ફંડરેઝિંગ માટે પણ કડક સમયમર્યાદા નક્કી કરી છે. હવે પ્રત્યેક AIF એ પોતાની સ્કીમનું પ્રથમ ક્લોઝિંગ ૧૨ મહિનાની અંદર જાહેર કરવું પડશે. નવા નિયમો હેઠળ માહિતીની ચોકસાઈ અને પારદર્શિતા જાળવવાની સંપૂર્ણ જવાબદારી મર્ચન્ટ બેન્કર અને AIF મેનેજરના શિરે રહેશે. ફંડ હાઉસે હવે ડ્યુ ડિલિજન્સ સર્ટિફિકેટ, ફિટ એન્ડ પ્રોપર ડિક્લેરેશન, સ્પોન્સર કમિટમેન્ટ અને મુખ્ય હોદ્દેદારોના ઓળખના દસ્તાવેજો સબમિટ કરવાના રહેશે.
ઇન્ડસ્ટ્રીમાં ઉત્સાહ:
સેબીનો આ નવો પરિપત્ર તાત્કાલિક અસરથી લાગુ કરી દેવામાં આવ્યો છે, જે હાલમાં પેન્ડિંગ રહેલી અરજીઓ પર પણ લાગુ થશે. આ ફેરફારથી બજારમાં નવી સ્કીમ લોન્ચ કરવાની ગતિ વધશે અને પ્રક્રિયામાં વધુ પારદર્શિતા આવશે. ઇન્વેસ્ટમેન્ટ ઇન્ડસ્ટ્રી સાથે જોડાયેલા નિષ્ણાતોએ સેબીના આ પગલાને આવકાર્યું છે અને તેને ડિજિટલ યુગમાં રોકાણની પ્રક્રિયાને વેગ આપનારું મહત્વનું પગલું ગણાવ્યું છે.