મુંબઈ : શેરબજારના પ્રાથમિક માર્કેટ (IPO બજાર) માં રોકાણ કરવા આતુર લોકો માટે એક અત્યંત મોટા અને ખુશીના સમાચાર આવ્યા છે. દેશની સૌથી મોટી બેંકની મ્યુચ્યુઅલ ફંડ શાખા એસબીઆઈ ફંડ્સ મેનેજમેન્ટના પ્રસ્તાવિત મેગા આઈપીઓ (IPO) ને મૂડીબજારની નિયમનકાર સંસ્થા સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (SEBI) દ્વારા સત્તાવાર રીતે લીલી ઝંડી આપી દેવામાં આવી છે.

સેબીની આ મંજૂરી બાદ હવે એસબીઆઈ ફંડ્સ મેનેજમેન્ટના શેર બજારમાં લિસ્ટિંગનો રસ્તો બિલકુલ સાફ થઈ ગયો છે. માર્કેટના સૂત્રો અને પ્રાપ્ત માહિતી અનુસાર, કંપની દ્વારા જુલાઈ મહિનાની શરૂઆતમાં જ આ આઈપીઓ માટેનું અંતિમ દસ્તાવેજ એટલે કે રેડ હેરિંગ પ્રોસ્પેક્ટસ (RHP) ફાઇલ કરવામાં આવે તેવી પ્રબળ શક્યતાઓ રહેલી છે.

આ આઈપીઓ મારફતે કંપની બજારમાંથી મોટું ભંડોળ એકત્ર કરવાની યોજના ધરાવે છે. એસબીઆઈ ફંડ્સ મેનેજમેન્ટ એ દેશની અગ્રણી એસેટ મેનેજમેન્ટ કંપનીઓમાંની એક છે, જેને કારણે રિટેલ રોકાણકારોથી માંડીને મોટા સંસ્થાકીય રોકાણકારોમાં આ આઈપીઓ વિશે ભારે ઉત્સાહ જોવા મળી રહ્યો છે.

આગામી દિવસોમાં આરએચપી ફાઇલ થયા બાદ આઈપીઓની પ્રાઇસ બેન્ડ, ઓપનિંગ અને ક્લોઝિંગ ડેટ તેમજ લોટ સાઈઝ અંગેની સંપૂર્ણ વિગતો સત્તાવાર રીતે જાહેર કરવામાં આવશે. માર્કેટ એક્સપર્ટ્સ માની રહ્યા છે કે સેબીની આ મંજૂરીથી શેરબજારમાં આઈપીઓના માહોલને નવો વેગ મળશે અને રોકાણકારો માટે એક બહુ મોટી તક ઉભી થશે.