અમદાવાદ : જો તમે શેરબજારના ઉતાર-ચઢાવ અને જોખમોથી દૂર રહીને પોતાના નાણાંનું સુરક્ષિત રોકાણ કરવા માંગો છો, તો સ્ટેટ બેન્ક ઓફ ઈન્ડિયા (SBI) ની એક વિશેષ યોજના તમારા માટે ઉત્તમ વિકલ્પ સાબિત થઈ શકે છે. SBI લાઈફ દ્વારા 'સ્માર્ટ પ્લેટિના પ્લસ' (Smart Platina Plus) નામનો નોન-લિંક્ડ અને નોન-પાર લાઈફ ઈન્શ્યોરન્સ સેવિંગ્સ પ્લાન રજૂ કરવામાં આવ્યો છે, જે રોકાણકારોને કોઈપણ પ્રકારના બજાર જોખમ વગર નિયમિત ગેરંટીડ આવક અને લાઈફ કવર પૂરું પાડે છે.

આ યોજનાની સૌથી મોટી ખાસિયત એ છે કે તેનું રિટર્ન સંપૂર્ણપણે નિશ્ચિત અને કોન્ટ્રેક્ચ્યુઅલ હોય છે, એટલે કે શેરબજારની વધઘટની આ પ્લાન પર કોઈ વિપરીત અસર પડતી નથી. આ પ્લાનમાં ગ્રાહકોને તેમની જરૂરિયાત મુજબ બે મુખ્ય વિકલ્પો મળે છે - પ્રથમ 'ગેરન્ટેડ ઈનકમ ઓપ્શન' અને બીજો 'લાઈફ ઈનકમ ઓપ્શન'. આ યોજના હેઠળ પોલિસીધારક પોતાની સુવિધા અનુસાર વાર્ષિક, અર્ધવાર્ષિક, ત્રિમાસિક કે દર મહિને નિયમિત આવક મેળવવાનો વિકલ્પ પસંદ કરી શકે છે, જે લોંગ-ટર્મ ફાયનાન્શિયલ ગોલ્સ પૂર્ણ કરવામાં મદદરૂપ બને છે.

પોલિસીની શરતો મુજબ, ગ્રાહકો પોતાની અનુકૂળતા મુજબ ૬, ૭, ૮ અથવા ૧૦ વર્ષ માટે પ્રીમિયમ ચુકવણીનો ગાળો (PPT) પસંદ કરી શકે છે. આ સ્કીમમાં જોડાવા માટે લઘુત્તમ વાર્ષિક પ્રીમિયમ રૂ. ૫૦,૦૦૦ નક્કી કરવામાં આવ્યું છે, જ્યારે લઘુત્તમ વીમા રકમ (Sum Assured) રૂ. ૫,૫૦,૦૦૦ રાખવામાં આવી છે. આ પ્લાન ખાસ કરીને એવા લોકો માટે ડિઝાઇન કરવામાં આવ્યો છે જેઓ પોતાની નિવૃત્તિ અથવા ભવિષ્યની નિયમિત આર્થિક જરૂરિયાતો માટે એક સચોટ અને ભરોસાપાત્ર માધ્યમ શોધી રહ્યા છે.

મેચ્યોરિટી અને અન્ય લાભોની વાત કરીએ તો, પોલિસીની મુદત પૂરી થવા પર રોકાણકારને તેમણે ભરેલા કુલ પ્રીમિયમના ૧૧૦ ટકા રકમ પરત (રિફંડ) કરવામાં આવે છે. આ ઉપરાંત, પોલિસી ગાળા દરમિયાન જો પોલિસીધારકનું કમનસીબે અવસાન થાય, તો નોમિનીને એકસાથે ડેથ બેનિફિટ ચૂકવવામાં આવે છે. આટલું જ નહીં, કોઈપણ આર્થિક કટોકટી કે ઈમર્જન્સીના સમયે ઓછામાં ઓછા ૨ વર્ષ પૂરા પ્રીમિયમ ભર્યા બાદ પોલિસીધારક તેની સરન્ડર વેલ્યુના ૫૦ ટકા સુધીની લોન પણ મેળવી શકે છે.