મુંબઈ, તા.૨૮: ગણેશોત્સવની પૂર્ણાહુતિ બાદ મહારાષ્ટ્રમાંથી ચોમાસાની વિદાયની ગણતરીઓ થઈ રહી હતી, ત્યાં જ હવામાન વિભાગ તરફથી એક ચિંતાજનક અપડેટ સામે આવ્યું છે. ઉત્તર ભારત પર અચાનક સક્રિય થયેલા એક મજબૂત 'વેસ્ટર્ન ડિસ્ટર્બન્સ'ને કારણે દેશના હવામાન ચક્રમાં મોટો બદલાવ આવ્યો છે. તાજેતરની સેટેલાઇટ તસવીરોમાં ઉત્તર ભારતથી લઈને પશ્ચિમ ભારતના વિશાળ પટ્ટા પર ઘનઘોર વાદળોનો ઘેરાવો સ્પષ્ટપણે જોઈ શકાય છે, જેણે હવામાન નિષ્ણાતો તેમજ સ્થાનિક નાગરિકોની ચિંતા વધારી દીધી છે.

આ નવી વેધર સિસ્ટમની સીધી અને આડકતરી અસર મહારાષ્ટ્રના અનેક જિલ્લાઓમાં જોવા મળશે. વાતાવરણના ઉપલા સ્તરોમાં સક્રિય થયેલા આ ડિસ્ટર્બન્સ અને અરબી સમુદ્રમાંથી આવતા ભેજયુક્ત પ્રવાહોના કારણે મુંબઈ, નવી મુંબઈ, થાણે, કોંકણ અને મધ્ય મહારાષ્ટ્રના વિસ્તારોમાં વાદળછાયું વાતાવરણ સર્જાયું છે. બપોર પછી ગરમી અને ભેજનું મિશ્રણ (કન્વેક્ટિવ એક્ટિવિટી) વધવાને કારણે સાંજ કે રાત્રિના સમયે વિજળીના કડાકા-ભડાકા અને ગાજવીજ સાથે હળવાથી મધ્યમ વરસાદી ઝાપટાં પડવાની પ્રબળ શક્યતા છે.

મુંબઈ અને આસપાસના વિસ્તારોમાં ભેજનું પ્રમાણ વધતાં ભારે બફારો અનુભવાઈ રહ્યો છે. આ ઉપરાંત રાયગઢ, રત્નાગિરી, સિંધુદુર્ગ અને પશ્ચિમ ઘાટના વિસ્તારોમાં પણ વરસાદી માહોલ જળવાઈ રહેશે. વિદર્ભ અને મધ્ય મહારાષ્ટ્રમાં સામાન્ય તાપમાન ફેરફાર સાથે વાદળોની હાજરી રહેશે. સામાન્ય રીતે સપ્ટેમ્બરના અંતમાં વરસાદનું જોર ઘટે છે, પરંતુ આ વર્ષે નવરાત્રિના આગમન પૂર્વે જ આ પ્રકારે કમોસમી વરસાદી સિસ્ટમ સક્રિય થતાં તહેવારોની તૈયારીઓમાં વિઘ્ન આવવાની દહેશત વ્યક્ત થઈ રહી છે.