નવી દિલ્હી: બોલીવુડના સુપરસ્ટાર સલમાન ખાનના 'વ્યક્તિત્વ અધિકારો'ના કથિત ઉલ્લંઘનને લઈને દિલ્હી હાઈકોર્ટમાં એક હાઈ-પ્રોફાઈલ કાનૂની જંગ શરૂ થઈ ગયો છે. વિવાદના કેન્દ્રમાં 'કાલા હરણ' નામની આગામી ફિલ્મ છે, જેની વિરુદ્ધ સલમાન ખાને કોર્ટના દ્વાર ખટખટાવ્યા છે. જસ્ટિસ જ્યોતિ સિંહની બેન્ચ સમક્ષ યોજાયેલી આ સુનાવણી દરમિયાન સલમાન ખાનના વકીલે તાત્કાલિક વચગાળાના સ્ટે આદેશની માંગ કરી હતી. અભિનેતા પક્ષની દલીલ છે કે આ ફિલ્મ અને તેના પ્રમોશનલ મટીરિયલથી સલમાન ખાનની વૈશ્વિક ઓળખ અને કાનૂની અધિકારોને સીધું નુકસાન થઈ રહ્યું છે.

બીજી તરફ, ફિલ્મ નિર્માતાઓના વકીલે કોર્ટમાં મજબૂત બચાવ કરતા દલીલ કરી હતી કે સલમાન ખાનનો આ દાવો માત્ર સોશિયલ મીડિયા પર વાયરલ થયેલા એક સિંગલ પોસ્ટર અને પ્રાથમિક ટીઝર પર આધારિત છે. ફિલ્મ હજુ રિલીઝ થવાથી ઘણી દૂર છે અને કાનૂની પ્રક્રિયા વિના તેને સીધી થિયેટરોમાં લાવી શકાય નહીં. વકીલે આક્ષેપ કર્યો હતો કે અરજદારે સેન્ટ્રલ બોર્ડ ઓફ ફિલ્મ સર્ટિફિકેશન ને આ કેસમાં પક્ષકાર બનાવ્યું નથી, જે અનિવાર્ય છે. નિર્માતાઓએ કોર્ટ સમક્ષ વિગતવાર અને ઔપચારિક લેખિત જવાબ દાખલ કરવા માટે સમયની માંગણી કરી હતી.

સુનાવણી દરમિયાન જ્યારે નિર્માતાઓએ મૌખિક ખાતરી આપી કે તેઓ ફિલ્મ તાત્કાલિક રિલીઝ કરવાના નથી, ત્યારે હાઈકોર્ટે કડક વલણ અપનાવીને તેને લેખિત રેકોર્ડ પર લેવાનો આદેશ કર્યો હતો. કોર્ટના આદેશ બાદ, નિર્માતાઓએ સત્તાવાર નિવેદન આપ્યું છે કે આગામી સોમવાર સુધી ફિલ્મ કે તેનું ટ્રેલર રિલીઝ કરવામાં નહીં આવે, તેમજ ફિલ્મને સેન્સર સર્ટિફિકેટ માટે સેન્ટ્રલ બોર્ડ સમક્ષ રજૂ કરવામાં આવશે નહીં. આ લેખિત ખાતરીને રેકોર્ડ પર લઈને હાઈકોર્ટે કેસની આગામી સુનાવણી સોમવાર પર મુલતવી રાખી છે, ત્યાં સુધી ફિલ્મની રિલીઝ પર બ્રેક વાગી ગઈ છે.