રોજની ૩૪૯૦ કેલરીની જરૂરિયાતના આધારે નક્કી થશે સરકારી કર્મચારીઓનો પગાર વધારો?
અગાઉના પગારપંચમાં દૈનિક ૨૭૦૦ કેલરીના સેવનને ધ્યાનમાં લેવામાં આવ્યું હતું : હેલ્થકેરનો ખર્ચ, શિક્ષણખર્ચ અને આધુનિક જીવનજરૂરિયાતોને ધ્યાનમાં લીધા પછી લઘુતમ પગાર ૫૫,૦૦૦થી ૬૦,૦૦૦ રૂપિયાની વચ્ચે હોવો જોઈએ
નવી દિલ્હી તા.૧: આઠમા પગારપંચ હેઠળ સરકારી કર્મચારીઓ માટે રજૂ કરાયેલા પગારવધારાનો નિર્ણય નવી ‘૩૪૯૦ કેલરી' ફોર્મ્યુલા દ્વારા લેવામાં આવી શકે છે. આ ફોર્મ્યુલા પગારવધારાને દૂધ, શાકભાજી અને અનાજ જેવી આવશ્યક ખાદ્ય ચીજોના ખર્ચ સાથે જોડે છે જે ૩૪૯૦ કેલરીના નિર્ધારિત કેલરીના સેવનને પૂર્ણ કરવા માટે જરૂરી છે. અગાઉના પગારપંચમાં ૨૭૦૦ કેલરીના સેવનને ધ્યાનમાં લેવામાં આવતું હતું. કર્મચારી સંગઠનોએ આઠમા પગારપંચને નવા લઘુતમ પગાર નક્કી કરતી વખતે આ પદ્ધતિ અપનાવવા વિનંતી કરી છે અને જણાવ્યું છે કે જૂની ફોર્મ્યુલા હાલના ખર્ચને પ્રતિબિબિત કરતી નથી. જો આ માગણી સ્વીકારવામાં આવે તો કેન્દ્ર સરકારના કર્મચારીઓના પગારમાં મૂળભૂત જીવનધોરણ જાળવવાના વધતા ખર્ચનો સમાવેશ થઈ શકે છે.
ઇન્ડિયન કાઉન્સિલ ઑફ મેડિકલ રિસર્ચ (ICMR) અને નેશનલ ઇન્સ્ટિટ્યૂટ ઑફ ન્યુટ્રિશન (NIN) દ્વારા જાહેર કરાયેલી નવીનતમ આહાર માર્ગદર્શિકા વ્યક્તિની શારીરિક પ્રવૃત્તિના સ્તરના આધારે દૈનિક કેલરી જરૂરિયાતોને વર્ગીકૃત કરે છે. ઊર્જાની જરૂરિયાતો બેઠાડુ, મધ્યમ સક્રિય અને ભારે સક્રિય જીવનશૈલી વચ્ચે બદલાય છે.
૧૯-૩૯ વર્ષની વયના પુખ્ત વયના લોકોમાં બેઠાડુ પુરુષો માટે ૨૧૧૦ કિલો કેલરી, ષીઓ માટે ૧૬૬૦ કિલો કેલરી; મધ્યમ પ્રવૃત્તિમાં પુરુષો માટે ૨૭૧૦ કિલો કેલરી, ષીઓ માટે ૨૧૩૦ કિલો કેલરી અને ભારે પ્રવૃત્તિ ધરાવતા પુરુષો માટે ૩૪૭૦ કિલો કેલરી અનેસ્ત્રીઓ માટે ૨૭૨૦ કિલો કેલરી ઊર્જા જરૂરી છે.
કર્મચારી સંગઠનોએ માગણી કરી છે કે ઘણી સરકારી ભૂમિકાઓમાં વ્યાપક ફીલ્ડવર્ક, વારંવાર મુસાફરી, ભરચક શેડ્યુલ, કાર્યસ્થળે તનાવ અને સતત શારીરિક પ્રયત્નો સામેલ હોય છે અને એ દૈનિક ઊર્જા જરૂરિયાતોમાં વધારો કરે છે.
હેલ્થકેરનો ખર્ચ, શિક્ષણખર્ચ અને આધુનિક જીવનજરૂરિયાતોને ધ્યાનમાં લીધા પછી લઘુતમ પગાર ૫૫,૦૦૦થી ૬૦,૦૦૦ રૂપિયાની વચ્ચે હોવો જોઈએ. આઠમા પગારપંચથી કેન્દ્ર સરકારના કર્મચારીઓ અને પેન્શનરો તેમ જ તેમના પરિવારો સહિત ૧.૧ કરોડથી વધુ લાભાર્થીઓને અસર થવાની ધારણા છે. અત્યાર સુધીમાં ભારતમાં ૭ પગારપંચ જોવા મળ્યાં છે. પ્રથમ પગારપંચ જાન્યુઆરી ૧૯૪૬માં સ્થાપિત થયું હતું અને ત્યારથી સામાન્ય રીતે દર ૧૦ વર્ષે એક નવું પગારપંચ રચવામાં આવ્યું છે. આઠમા પગારપંચની રચના ૨૦૨૫ની ૩ નવેમ્બરે કરવામાં આવી હતી.
(10:01 AM IST)
છેલ્લા 8 દિવસમાં સૌથી લોકપ્રિય 
