કિવ : યુક્રેનના ડનીપ્રો રેલ્વે સ્ટેશન પર ગુરુવારે સવારે રશિયા દ્વારા કરવામાં આવેલા એક દર્દનાક ડ્રોન હુમલામાં ૧૩ મુસાફરોના સ્થળ પર જ કરૂણ મોત નિપજ્યા છે અને અન્ય ૧૦ લોકો ગંભીર રીતે ઘાયલ થયા છે. સ્ટેશનના પ્લેટફોર્મ પર ઉભેલી પેસેન્જર ટ્રેનને સીધી ટાર્ગેટ કરીને કરવામાં આવેલા આ ભયાનક હુમલાથી સમગ્ર વિસ્તારમાં ભારે અફરાતફરી અને ચીસાચીસ મચી ગઈ હતી.

પ્રાપ્ત વિગતો અનુસાર, યુક્રેનિયન રેલ્વેના સત્તાવાર વર્તુળોએ જણાવ્યું હતું કે આ હુમલામાં રશિયા દ્વારા અત્યાધુનિક જેટ-સંચાલિત ડ્રોનનો ઉપયોગ કરવામાં આવ્યો હતો. આ ડ્રોને સ્ટેશનના પ્લેટફોર્મ પર પાર્ક કરાયેલી ડનીપ્રો-ઝાપોરિઝિયા રૂટની ટ્રેન નંબર ૮૬૬ ને સીધું નિશાન બનાવ્યું હતું, જેના કારણે ટ્રેનના ડબ્બા અને પ્લેટફોર્મને ભારે નુકસાન પહોંચ્યું હતું.

અધિકારીઓના જણાવ્યા મુજબ, વિસ્તારમાં અગાઉથી જ હાઇ એલર્ટ જાહેર કરવામાં આવ્યું હોવા છતાં, મોટી સંખ્યામાં મુસાફરો પ્લેટફોર્મ પર હાજર હોવાના કારણે જાનહાનિનો આંકડો ઊંચો ગયો હતો. ડનીપ્રોના મેયર બોરિસ ફિલાટોવે આ ઘટનાને શહેર માટે એક ભારે દુર્ઘટના ગણાવતા આક્ષેપ કર્યો હતો કે રશિયન દળોએ સામાન્ય નાગરિકોને લઈ જતી ઇલેક્ટ્રિક ટ્રેન પર ઇરાદાપૂર્વક હુમલો કર્યો છે.

આ ભયાનક ઘટના બાદ યુક્રેનના રાષ્ટ્રપતિ વોલોડીમીર ઝેલેન્સકીએ ભારે રોષ વ્યક્ત કરતા આંતરરાષ્ટ્રીય સમુદાયને રશિયા સામે કડક પગલાં લેવા અપીલ કરી હતી. તેમણે સોશિયલ મીડિયા પર સવાલ ઉઠાવ્યો હતો કે રશિયન ઉદ્યોગપતિઓ અને ઉર્જા ક્ષેત્ર પરના પ્રતિબંધોમાં રાહત આપ્યા બાદ પણ રશિયા તણાવ ઘટાડવાને બદલે નિર્દોષ નાગરિકો પર સતત આતંકવાદી હુમલા કરી રહ્યું છે.

આ હુમલો યુક્રેનના પરિવહન નેટવર્કને લક્ષ્ય બનાવવાની રશિયાની વધતી આક્રમક રણનીતિનો એક ભાગ જણાય છે, જ્યાં ગયા રવિવારે પણ પોલેન્ડ સરહદ નજીક એક ટ્રેન પર ડ્રોન હુમલો થયો હતો. રશિયાના નવા જેટ-સંચાલિત ડ્રોન, જેમને તોડી પાડવા અત્યંત મુશ્કેલ છે, તે હાલમાં શોપિંગ સેન્ટરો, પાવર પ્લાન્ટ્સ અને રેલ્વે જેવી મહત્વપૂર્ણ માળખાકીય સુવિધાઓને સતત નિશાન બનાવી રહ્યા છે.

યુક્રેનના સરકારી રેલ ઓપરેટરના આંકડા મુજબ, એકલા ૨૦૨૬ ના વર્ષ દરમિયાન જ રશિયા દ્વારા ૧,૭૦૦ થી વધુ રેલ સુવિધાઓ, સ્ટેશનો અને પેસેન્જર ગાડીઓ પર હુમલા કરવામાં આવ્યા છે. હાલમાં ઘટનાસ્થળે બચાવ કામગીરી પૂર્ણ કરી ઘાયલોને તાત્કાલિક હોસ્પિટલમાં ખસેડવામાં આવ્યા છે અને સુરક્ષા વ્યવસ્થા વધુ સઘન બનાવવામાં આવી છે.