મોસ્કો : વૈશ્વિક ઊર્જા બજાર અને આંતરરાષ્ટ્રીય રાજનીતિને અસર કરે તેવા એક મોટા સમાચાર રશિયાથી સામે આવ્યા છે. રશિયન સરકાર દ્વારા સોમવારે સત્તાવાર જાહેરાત કરીને દેશમાંથી એવિએશન ફ્યુઅલ (હવાઈ જહાજોમાં વપરાતું ઇંધણ - જેટ ફ્યુઅલ) ની નિકાસ પર આગામી ૩૦ નવેમ્બર સુધી તાત્કાલિક અસરથી સંપૂર્ણ પ્રતિબંધ મૂકી દેવામાં આવ્યો છે. રશિયાના આ નિર્ણય પાછળ યુક્રેન દ્વારા રશિયાની વિવિધ ઓઇલ રિફાઇનરીઓ અને અન્ય ઊર્જા ઇન્ફ્રાસ્ટ્રક્ચર પર સતત કરવામાં આવી રહેલા સૈન્ય હુમલા મુખ્ય જવાબદાર હોવાનું માનવામાં આવી રહ્યું છે.

સરકાર દ્વારા બહાર પાડવામાં આવેલા સત્તાવાર નિવેદનમાં સ્પષ્ટપણે જણાવવામાં આવ્યું છે કે, આ મહત્વપૂર્ણ નિર્ણયનો મુખ્ય ઉદ્દેશ્ય રશિયાના સ્થાનિક ઇંધણ બજારમાં સ્થિરતા સુનિશ્ચિત કરવાનો છે. રશિયા સામાન્ય રીતે સેન્ટ્રલ એશિયા (મધ્ય એશિયા) ના દેશો જેવા કે કઝાકિસ્તાન, કિર્ગિસ્તાન, તાજિકિસ્તાન અને ઉઝબેકિસ્તાનને રેલવે માર્ગે મોટા પાયે જેટ ફ્યુઅલની નિકાસ કરે છે, જેના પર હવે આગામી નવેમ્બર મહિનાના અંત સુધી સંપૂર્ણ રોક લાગી જશે.

નોંધનીય છે કે, રશિયાએ અગાઉથી જ ગેસોલિન (પેટ્રોલ) ની નિકાસ પર મર્યાદાઓ અને નિયંત્રણો લાદી દીધેલા છે. જોકે, સરકારે હજુ સુધી ડીઝલની નિકાસ અંગે કોઈ સત્તાવાર અંતિમ નિર્ણય લીધો નથી. આમ છતાં, ઇન્ટરફેક્સ ન્યૂઝ એજન્સીના ગત સપ્તાહના અહેવાલ મુજબ, દેશમાં ડીઝલની નિકાસ પર પણ કડક પગલાં લેવા અંગે હાલ ગંભીર વિચારણા ચાલી રહી છે.

રોઇટર્સ દ્વારા શુક્રવારે જાહેર કરવામાં આવેલા સત્તાવાર આંકડાઓ અનુસાર, યુક્રેન દ્વારા રશિયાની ઓઇલ રિફાઇનરીઓ પર કરવામાં આવેલા ડ્રોન હુમલાઓને કારણે પ્રોડક્શન યુનિટ્સને પોતાની કામગીરી કાં તો ઘટાડવી પડી છે અથવા સંપૂર્ણપણે બંધ કરવાની ફરજ પડી છે. આ આંતરરાષ્ટ્રીય સંઘર્ષની સીધી અસર ઉત્પાદન પર જોવા મળી છે, જેમાં એપ્રિલ મહિનામાં ડીઝલના માસિક ઉત્પાદનમાં ૧૦ ટકાનો ઘટાડો નોંધાયા બાદ મે મહિનામાં પણ ઉત્પાદનમાં વધુ ૧૦ ટકાનો મોટો ઘટાડો થયો છે. એક તરફ દેશમાં ઇંધણનું ઉત્પાદન સતત ઘટી રહ્યું છે, ત્યારે બીજી તરફ તેની નિકાસના દરમાં વધારો નોંધાતા સરકારે આખરે સ્થાનિક બજારને સુરક્ષિત કરવા એવિએશન ફ્યુઅલ પર પ્રતિબંધનો આકરો કોરડો વીંઝવો પડ્યો છે.