બુખારેસ્ટ  : રશિયા અને યુક્રેન વચ્ચેનું યુદ્ધ નાટો દેશોની સુરક્ષા માટે વધુ ગંભીર પડકાર બની રહ્યું છે. રોમાનિયાની હવાઈસેનાએ કાળા સમુદ્ર ઉપર પોતાના હવાઈક્ષેત્રમાં પ્રવેશેલાં બે માનવરહિત હુમલાખોર વિમાનોને તોડી પાડ્યાં છે. રોમાનિયાના સંરક્ષણમંત્રી રાડુ મિરુતાએ રવિવારે જણાવ્યું હતું કે બંને વિમાનો રશિયન બનાવટનાં અત્યાધુનિક ગેરાન શ્રેણીનાં હોવાની શક્યતા છે. આ પ્રકારનાં અત્યંત ઝડપી માનવરહિત વિમાનોને પ્રથમ વખત તોડી પાડવામાં આવ્યાં હોવાનું તેમણે જણાવ્યું હતું.

રશિયા-યુક્રેન યુદ્ધ વચ્ચે કાળા સમુદ્રના વિસ્તારમાં સુરક્ષાની સ્થિતિ વધુ તંગ બની છે. નાટો સંગઠનના સભ્ય રોમાનિયાએ શનિવારે સાંજે પોતાના હવાઈક્ષેત્રમાં ઘૂસેલાં બે માનવરહિત વિમાનો સામે લશ્કરી કાર્યવાહી કરી હતી.

રોમાનિયાના સંરક્ષણ મંત્રાલયના જણાવ્યા પ્રમાણે રડાર ઉપર શંકાસ્પદ વિમાનો દેખાતાં બોર્સિયા લશ્કરી હવાઈમથકેથી બે લડાકુ વિમાનો રવાના કરવામાં આવ્યાં હતાં.

પ્રથમ માનવરહિત વિમાન રોમાનિયાના હવાઈક્ષેત્રમાં પ્રવેશ્યાની બે મિનિટમાં સુલિના શહેરથી આશરે ૨૫ કિલોમીટર દૂર તોડી પાડવામાં આવ્યું હતું. બીજું વિમાન સુલિનાથી આશરે ૨૦ કિલોમીટર દૂર તોડી પાડવામાં આવ્યું હતું.

સંરક્ષણમંત્રી મિરુતાના જણાવ્યા પ્રમાણે આ વિમાનો કલાકના આશરે ૪૫૦ કિલોમીટરની ઝડપે ઊડી રહ્યાં હતાં. પ્રાથમિક માહિતીના આધારે તે રશિયન બનાવટનાં ગેરાન-૪ પ્રકારનાં હોવાની આશંકા વ્યક્ત કરવામાં આવી છે. જોકે વિમાનો કોણે છોડ્યાં હતાં તેની અંતિમ પુષ્ટિ થઈ નથી.

આ ઘટના અગાઉ રોમાનિયાના દરિયાકાંઠે બે રાસાયણિક પદાર્થો વહન કરતાં જહાજો ઉપર માનવરહિત વિમાનો વડે હુમલા થયા હતા. તે ઘટનાઓમાં ગુમ થયેલા સાત નાવિકોની શોધખોળ હજુ ચાલુ છે.

રોમાનિયાના વિદેશમંત્રી ઓઆના તોઇયુએ જણાવ્યું છે કે કાળા સમુદ્રની સુરક્ષા અને સંરક્ષણ વ્યવસ્થા અંગે મંગળવારે નાટોની ઉત્તર એટલાન્ટિક પરિષદની બેઠક યોજાશે.

નાટોના એક અધિકારીએ જણાવ્યું છે કે સંગઠન પોતાના સભ્ય દેશોના પ્રદેશ અને નાગરિકોની સુરક્ષા માટે કોઈપણ સંભવિત જોખમનો સામનો કરવા તૈયાર છે.