કીવ: દક્ષિણ યુક્રેનના મહત્વના શહેર ઝાપોરિઝ્ઝિયા પર રશિયાએ રાતોરાત આક્રમક ગ્લાઇડ બોમ્બ વડે બોમ્બમારો કરીને ભારે વિનાશ વેર્યો છે. માત્ર ૯૦ મિનિટના ટૂંકા ગાળામાં ફેંકાયેલા ૮ રશિયન ગ્લાઇડ બોમ્બ રહેણાંક વિસ્તારો પર ત્રાટકતા ૨૨ જેટલી એપાર્ટમેન્ટ બિલ્ડિંગોને મોટું નુકસાન પહોંચ્યું છે. આ ભયાનક હુમલામાં એક વૃદ્ધ મહિલાનું મોત નીપજ્યું છે જ્યારે ૧૬ વર્ષની સગીરા સહિત ૩૧ લોકો ગંભીર રીતે ઘાયલ થયા છે.

ચાર વર્ષથી વધુ સમયથી ચાલી રહેલા આ પૂર્ણ-સ્તરના યુદ્ધમાં રશિયા હવે સોવિયેત યુગના ૩,૦૦૦ કિલોગ્રામ સુધીના વિસ્ફોટકો ધરાવતા ગ્લાઇડ બોમ્બનો મોટા પાયે ઉપયોગ કરી રહ્યું છે. માર્ગદર્શન પ્રણાલીથી સજ્જ આ બોમ્બ દૂરથી ફેંકવામાં આવતા હોવાથી યુક્રેન પાસે તેને રોકવા માટે કોઈ અસરકારક એર ડિફેન્સ સિસ્ટમ ઉપલબ્ધ નથી. આ પરિસ્થિતિ વચ્ચે યુક્રેનના પ્રમુખ વોલોડીમીર ઝેલેન્સકીએ અમેરિકા અને યુરોપીયન સાથી દેશોને તાત્કાલિક 'પેટ્રિઅટ' એર ડિફેન્સ સિસ્ટમ્સ આપવા વિનંતી કરી છે. તેમણે કહ્યું કે, "એન્ટિ-બેલિસ્ટિક મિસાઇલો લોકોના રક્ષણ માટે છે, તેને ભંડારમાં ભરી રાખવાનો કોઈ અર્થ નથી."

બીજી તરફ, યુક્રેને પણ જવાબી કાર્યવાહી કરતા ૧૩૧ ડ્રોન વડે રશિયાના વિવિધ સ્થળો પર હુમલો કર્યો હતો. યુક્રેનિયન ડ્રોન્સે મોસ્કો પૂર્વમાં આવેલા રશિયાના સૌથી મોટા ઓનલાઈન રિટેલર 'વાઇલ્ડબેરી' ના ગોદામ તેમજ સારાટોવ તેલ રિફાઇનરી અને એંગલ્સ લશ્કરી એરફિલ્ડને નિશાન બનાવીને ભારે નુકસાન પહોંચાડ્યું હતું. સામે પક્ષે રશિયાએ ૧૮૧ હુમલાખોર ડ્રોન યુક્રેન પર છોડ્યા હતા અને કાળા સમુદ્રમાં યુક્રેની સૈન્યને પુરવઠો આપતા ૪ બલ્ક કેરિયર્સ પર હુમલો કરવાનો દાવો કર્યો છે. બંને દેશો વચ્ચેનો આ સંઘર્ષ હવે સીમાઓ વટાવીને નાગરિક અને આર્થિક માળખા પર વિઘાતક બની રહ્યો છે.