મોસ્કો :  યુક્રેનની રાજધાની કિવના પશ્ચિમમાં આવેલા માયલા ગામમાં લશ્કરી સામગ્રી અને દારૂગોળો ધરાવતા એક વેરહાઉસ પર રશિયાના ભીષણ હુમલા બાદ સ્થિતિ વણસી ગઈ છે. આ વિસ્ફોટ અને તેને કારણે લાગેલી વિકરાળ આગને લીધે નજીકના અનેક મકાનો અને ઇમારતો ઝપેટમાં આવી ગઈ હતી. યુક્રેનિયન રાષ્ટ્રપતિ વોલોદિમિર ઝેલેન્સકીએ પુષ્ટિ કરી છે કે આ હોનારતમાં મૃત્યુઆંક વધીને ૩૮ પર પહોંચ્યો છે, જેમાં વૃદ્ધાશ્રમના રહેવાસીઓ સહિત નાગરિકોનો સમાવેશ થાય છે, જ્યારે અન્ય ૨૦ લોકો ઘાયલ થયા છે. સ્થળ પરથી હજી પણ ચાર લોકો ગુમ હોવાથી રાહત અને બચાવ કામગીરી ૨૪ કલાક ચાલુ રાખવામાં આવી છે.

સામે પક્ષે, યુક્રેને પણ રશિયાના આર્થિક માળખાને નિશાન બનાવીને વળતો પ્રહાર કર્યો છે. યુક્રેને રશિયન ઈ-કોમર્સ કંપની 'વાઇલ્ડબેરી' (જેને રશિયાની એમેઝોન ગણવામાં આવે છે) અને તેલ સુવિધાઓ પર ડ્રોન હુમલા કર્યા છે. આ ઉપરાંત, રશિયાની બીજી સૌથી મોટી કિરીશી તેલ રિફાઇનરી પર યુક્રેનિયન ડ્રોન ત્રાટકતા ત્યાં વિશાળ આગ ફાટી નીકળી હતી. યુક્રેનનો દાવો છે કે રશિયન ઈ-કોમર્સ પ્લેટફોર્મ અને ઊર્જા ક્ષેત્ર જ ક્રેમલિનના યુદ્ધ પ્રયાસોને ભંડોળ પૂરું પાડે છે. આ સતત હુમલાઓને કારણે રશિયાના દેશભરમાં બળતણની ભારે અછત ઊભી થઈ છે.

દરમિયાન, રશિયન સંરક્ષણ મંત્રાલયે દાવો કર્યો છે કે તેણે રાતોરાત યુક્રેન દ્વારા છોડાયેલા લગભગ ૫૦૦ ડ્રોનને આકાશમાં જ તોડી પાડ્યા અથવા નિષ્ક્રિય કર્યા છે. ક્રેમલિનના પ્રવક્તા દિમિત્રી પેસ્કોવે ચેતવણી આપી છે કે રશિયાની નાગરિક અર્થવ્યવસ્થા પરના હુમલાનો યોગ્ય જવાબ આપવા માટે તેઓ યુક્રેનના એનર્જી ગ્રીડ અને પાવર ઇન્ફ્રાસ્ટ્રક્ચર પર "મોટો અને વ્યવસ્થિત" હુમલો કરવાની તૈયારી કરી રહ્યા છે. યુક્રેનિયન અધિકારીઓએ ભય વ્યક્ત કર્યો છે કે રશિયાના આ સંભવિત હુમલાઓ આગામી શિયાળામાં દેશના લાખો લોકોને અંધકાર અને ગંભીર વીજ કટોકટીમાં ધકેલી શકે છે.