મુંબઈ : વૈશ્વિક બજારમાં ક્રૂડતેલના ભાવમાં થયેલો વધારો, વિદેશી સંસ્થાકીય રોકાણકારોની ઈક્વિટી માર્કેટમાં અવિરત વેચવાલી અને રિઝર્વ બૅન્કની નાણાકીય નીતિની બેઠક પૂર્વે સર્જાયેલી અનિશ્ચિતતા વચ્ચે આજે સ્થાનિક ફોરેક્સ માર્કેટમાં ડૉલર સામે ભારતીય રૂપિયો ગત ગુરુવારના બંધ સામે ૧૦ પૈસા નબળો પડીને ૯૬.૩૫ની સપાટીએ બંધ રહ્યો હતો. ગાંધી જયંતીની રજા બાદ ખૂલેલા બજારમાં રૂપિયો શરૂઆતમાં ૯૬.૨૦ના સુધારા સાથે ખૂલ્યા બાદ સતત દબાણ હેઠળ રહ્યો હતો.

આજના કારોબારી સત્ર દરમિયાન ડૉલર સામે રૂપિયો ઉપરમાં ૯૬.૨૦ અને નીચામાં ૯૬.૩૫ની રેન્જમાં અથડાયો હતો. બજાર નિષ્ણાતોના મતે ડૉલર ઈન્ડેક્સમાં સુધારાની આગેકૂચ અને વૈશ્વિક સ્તરે અનિશ્ચિતતા જળવાઈ રહેતાં રૂપિયો માનસિક સપાટી ગુમાવીને નીચલા મથાળે ટ્રેડ થઈ રહ્યો છે, જેના કારણે આયાતકારો અને સ્થાનિક ઉદ્યોગો પર બોજ વધવાની આશંકા વ્યક્ત કરવામાં આવી રહી છે.

નાણાકીય વિશ્લેષકોના જણાવ્યા અનુસાર, વિદેશી સંસ્થાકીય રોકાણકારો દ્વારા સ્થાનિક શેરબજારમાંથી સતત મૂડી પાછી ખેંચવામાં આવી રહી હોવાથી ફોરેક્સ માર્કેટ પર વિપરીત અસર પડી છે. તાજેતરના આંકડા મુજબ વિદેશી ફંડોએ ભારતીય ઈક્વિટીમાંથી રૂ. ૯,૪૮૪.૨૨ કરોડની ચોખ્ખી વેચવાલી કરી હતી. આ ઉપરાંત વિશ્વ બજારમાં બે્રન્ટ ક્રૂડતેલના ભાવ વધીને બેરલદીઠ ૧૦૨.૪૮ ડૉલર આસપાસ પહોંચતાં રૂપિયા પર વધારાનું દબાણ સર્જાયું હતું.

બીજી તરફ, રિઝર્વ બૅન્ક ઑફ ઈન્ડિયાની ત્રણ દિવસીય નીતિવિષયક બેઠક આજથી શરૂ થઈ રહી છે. બજાર વર્તુળો એવી અટકળો લગાવી રહ્યા છે કે ફુગાવાને નિયંત્રણમાં રાખવા માટે રિઝર્વ બૅન્ક આ બેઠકના અંતે વ્યાજદરમાં ૨૫ બેસિસ પૉઈન્ટનો વધારો કરી શકે છે. અત્રે ઉલ્લેખનીય છે કે હાલમાં રેપો રેટ ૫.૨૫ ટકાની સપાટીએ છે, જેથી વ્યાજદરમાં વધારાની શક્યતા વચ્ચે રોકાણકારો સાવચેતીનો અભિગમ અપનાવી રહ્યા છે.

જોકે, કરન્સી માર્કેટમાં નબળાઈ વચ્ચે પણ સ્થાનિક શેરબજારમાં પોઝિટિવ વલણ જોવા મળ્યું હતું. આજના કારોબારના અંતે બીએસઈ સેન્સેક્સ ૪૭૨.૭૭ પૉઈન્ટ અને એનએસઈ નિફ્ટી ૧૩૩.૮૦ પૉઈન્ટના સુધારા સાથે બંધ રહ્યા હતા. ઇક્વિટી માર્કેટમાં રિકવરી હોવા છતાં વિદેશી બજારમાં ડૉલર ઈન્ડેક્સ ૦.૨૫ ટકા વધીને ૧૦૨.૧૮ની મજબૂત સપાટીએ પહોંચતાં રૂપિયાને ટેકો મળી શક્યો નહોતો.

નાણાકીય વિશ્લેષકોના અનુમાન મુજબ, આગામી ટૂંકા સમયગાળામાં ડૉલર સામે રૂપિયો કોન્સોલિડેટ થઈને ૯૫.૯૫થી ૯૬.૫૦ની રેન્જમાં રહેવાની શક્યતા છે. રિઝર્વ બૅન્ક દ્વારા લેવાનારા નિર્ણયો અને વૈશ્વિક ક્રૂડતેલના ભાવની ચાલ આગામી દિવસોમાં રૂપિયાની ભાવિ દિશા નક્કી કરવામાં મહત્ત્વનો ભાગ ભજવશે.