​નવી દિલ્હી: દેશમાં નવા મતદારોની નોંધણી કરાવવા માટેની પ્રક્રિયામાં ચૂંટણી પંચ દ્વારા એક મોટો અને મહત્વનો ફેરફાર કરવામાં આવ્યો છે. હવેથી જે પણ નાગરિકો પ્રથમ વખત મતદાર યાદીમાં નામ નોંધાવવા માંગે છે અથવા નવું વોટર આઈડી કાર્ડ કઢાવવા માંગે છે, તેમણે ફોર્મ-૬ (Form-6) ભરતી વખતે SIR (Special Intensive Revision) અંતર્ગત પોતાના પરિવારની પૃષ્ઠભૂમિની વિગતો આપવી ફરજિયાત રહેશે. ચૂંટણી પંચે આ માટે ફોર્મ-૬માં એક નવી વિશેષ કોલમ ઉમેરી દીધી છે. આ નવા નિયમ અંતર્ગત હવે દરેક નવા અરજદારે એ સ્પષ્ટ કરવું પડશે કે તેમના માતા-પિતાનું નામ પાછલી મતદાર યાદીમાં સામેલ હતું કે નહીં. જો માતા-પિતા હયાત ન હોય અથવા તેમની વિગતો ઉપલબ્ધ ન હોય, તો દાદા-દાદીનું નામ અગાઉની મતદાર યાદીમાં હતું કે નહીં તેની સંપૂર્ણ વિગતો આપવી પડશે. આ નવો નિયમ હાલ પૂરતો ચૂંટણી પંચ દ્વારા ઓનલાઈન ફોર્મ સબમિશનની પ્રક્રિયામાં સત્તાવાર રીતે લાગુ કરી દેવામાં આવ્યો છે.
​બીજી તરફ, ચૂંટણી પંચના આ અચાનક લેવાયેલા નિર્ણયના કારણે આગામી સમયમાં નવા મતદારો માટે મુશ્કેલીઓ વધી શકે છે. તાજેતરના આંકડાઓ અનુસાર, દેશના ૧૦ પ્રમુખ રાજ્યોમાં અલગ-અલગ ટેકનિકલ કે અન્ય કારણોસર અંદાજે ૫.૫૮ કરોડ લોકોના નામ મતદાર યાદીમાંથી કાઢી નાખવામાં આવ્યા છે. આવા સંજોગોમાં આ નવો કડક નિયમ આવવાથી જેમનું નામ કપાયું છે અથવા જેઓ નવા મતદાર તરીકે જોડાવવા માંગે છે, તેમને જૂનો રેકોર્ડ શોધવામાં મોટી હાલાકીનો સામનો કરવો પડી શકે છે. આ ઉપરાંત, આ સમગ્ર મામલે એક નવો કાયદાકીય વિવાદ પણ ઊભો થયો છે. અહેવાલો અનુસાર, ચૂંટણી પંચે ફોર્મ-૬માં આટલો મોટો ફેરફાર કરતા પહેલા કેન્દ્રીય કાયદા મંત્રાલય (Ministry of Law and Justice) ની કોઈ પૂર્વ મંજૂરી લીધી નથી. નિયમ મુજબ ફોર્મમાં ફેરફાર માટે મંત્રાલયની મંજૂરી આવશ્યક હોવાથી, પંચના આ એકતરફી પગલા સામે હવે કાયદાકીય નિષ્ણાતો દ્વારા સવાલો ઉઠાવવામાં આવી રહ્યા છે.