વૈષ્ણોદેવી મંદિરમાં ૫૦૦ કરોડ રૂપિયાની છેતરપિંડી
શ્રી માતા વૈષ્ણોદેવી મંદિરમાં ૨૦ ટનથી વધુ નકલી ચાંદી ચઢાવવામાં આવીઃ કોર્ટે પોલીસ પાસે રેકોર્ડ માંગ્યા
જમ્મુ તા.૧૪: જમ્મુની એક કોર્ટે શ્રી માતા વૈષ્ણોદેવી મંદિરમાં ૫૫૦ કરોડ રૂપિયાની નકલી ચાંદી ચઢાવવામાં આવી હોવાના કેસમાં પોલીસને રેકોર્ડ રજૂ કરવાનો આદેશ આપ્યો છે.
કોર્ટે તપાસ અધિકારીને ૨૯ જુલાઈના રોજ આગામી સુનાવણી દરમિયાન રૂબરૂ હાજર રહેવાનો આદેશ આપ્યો છે. એ નોંધવું જોઈએ કે શ્રી માતા વૈષ્ણોદેવી મંદિરમાં ભક્તો દ્વારા ૨૦ ટનથી વધુ ચાંદી અર્પણ કરવામાં આવી હતી. તેની બજાર કિમત આશરે રૂા.૫૫૦ કરોડ છે.
જ્યારે બોર્ડે ચાંદીને પીગળવા માટે મોકલી હતી, ત્યારે ફક્ત પાંચથી છ ટકા જ મળી હતી. બાકીની ચાંદીમાં કેડમિયમ અને લોખંડ જેવા તત્વો હોવાનું બહાર આવ્યું હતું, જેનો અર્થ એ થયો કે મોટાભાગની ચાંદી નકલી હતી. આ ઘટના બાદ, જમ્મુ સ્થિત એડવોકેટ દીપક શર્માએ ૯ મેના રોજ પોલીસ મહાનિરીક્ષક (ક્રાઈમ બ્રાન્ચ) અને આર્થિક ગુના શાખા (EOW), જમ્મુના SSP સમક્ષ વિગતવાર ફરિયાદ નોંધાવી હતી, જેમાં FIR નોંધવાની અને તપાસની માંગણી કરવામાં આવી હતી.
તેમને શંકા હતી કે મંદિરમાં ભક્તો દ્વારા અર્પણ કરવામાં આવેલી ચાંદીમાં ભેળસેળ કરવામાં આવી હતી અથવા તેની આપ-લે કરવામાં આવી હતી. છેડછાડની આશંકા હોવાથી, તેમણે સંપૂર્ણ તપાસની માંગણી કરી. જ્યારે પોલીસ તપાસ આગળ વધવામાં નિષ્ફળ ગઈ, ત્યારે તેમણે કોર્ટનો સંપર્ક કર્યો, FIR દાખલ કરીને તપાસની માંગ કરી.
કોર્ટના નિર્દેશો પર, ક્રાઈમ બ્રાન્ચે એક સ્ટેટસ રિપોર્ટમાં જણાવ્યું હતું કે, ક્રાઈમ હેડક્વાર્ટર, શ્રીનગરની મંજૂરી પછી, આ મામલો ઝોનલ પોલીસ હેડક્વાર્ટર, જમ્મુને મોકલવામાં આવ્યો હતો. અરજદારે આનો વિરોધ કર્યો હતો, અને દલીલ કરી હતી કે આર્થિક ગુના શાખા (EOW) જમ્મુમાં એક અલગ પોલીસ સ્ટેશન છે અને ફરિયાદ પર કાર્યવાહી કરવી જોઈતી હતી.
તેમણે જણાવ્યું હતું કે રિપોર્ટમાં મહત્વપૂર્ણ પુરાવા સાચવવા માટે લેવામાં આવેલા કોઈપણ પગલાંનો ઉલ્લેખ નથી. આ પછી, જમ્મુના મુખ્ય ન્યાયિક મેજિસ્ટ્રેટે તપાસ અધિકારીને ૨૯ જુલાઈએ સંપૂર્ણ રેકોર્ડ સાથે કોર્ટમાં રૂબરૂ હાજર થવાનો આદેશ આપ્યો.
(10:26 AM IST)
છેલ્લા 8 દિવસમાં સૌથી લોકપ્રિય 
