​ હૈદરાબાદ:આંધ્રપ્રદેશના રાજકારણમાં ભારે ચર્ચાસ્પદ બનેલો વાય.એસ.આર. પરિવારનો આંતરિક વિવાદ હવે વધુ વકર્યો છે. પૂર્વ મુખ્યમંત્રી વાય.એસ. જગન મોહન રેડ્ડી અને તેમના બહેન તથા આંધ્રપ્રદેશ કોંગ્રેસના પ્રમુખ વાય.એસ. શર્મિલા વચ્ચેના સંબંધોમાં પડેલી તિરાડ હવે પારિવારિક પ્રસંગો સુધી પહોંચી ગઈ છે. જગન મોહન રેડ્ડીએ પોતાની ભાણી અંજલિ રેડ્ડીના લગ્ન માટે બેંગલુરુ સ્થિત 'યેલાહંકા પેલેસ' આપવાની ના પાડી દેતાં, શર્મિલાએ લગ્નનું સ્થળ બદલીને બેંગલુરુ શહેરની બહાર ખસેડવાની ફરજ પડી છે.

​સુરક્ષા અને પ્રોટોકોલનું બહાનું ધરી સ્થળ ના આપ્યું

સૂત્રોના જણાવ્યા અનુસાર, વાય.એસ. શર્મિલા તેમની પુત્રી અંજલિ રેડ્ડીના લગ્ન બેંગલુરુના ભવ્ય યેલાહંકા પેલેસ ખાતે યોજવા માંગતા હતા. આ સંપત્તિ પરિવાર સાથે જોડાયેલી હોવાથી ત્યાં આયોજનની તૈયારીઓ ચાલી રહી હતી. જોકે, પૂર્વ મુખ્યમંત્રી અને વાયએસઆરસીપી (YSRCP)ના વડા જગન મોહન રેડ્ડીએ સુરક્ષા અને પ્રોટોકોલ કારણોસર પોતાની માલિકીના આ પેલેસને લગ્ન સમારોહ માટે આપવાનો સ્પષ્ટ ઇનકાર કરી દીધો હતો.

​ભાઈના વલણ બાદ શર્મિલાએ સ્થળ બદલવાનો લીધો નિર્ણય

સગા ભાઈ તરફથી આ પ્રકારે નકારાત્મક વલણ મળ્યા બાદ, વાય.એસ. શર્મિલાએ બેંગલુરુ પેલેસમાં લગ્ન કરવાનો આગ્રહ જતો કરીને આયોજન અન્ય જગ્યાએ શિફ્ટ કર્યું છે. હવે આ હાઇ પ્રોફાઇલ લગ્ન બેંગલુરુ શહેરની બહાર આવેલી એક અલગ ખાનગી મિલકતમાં યોજાશે. ભાઈ-બહેન વચ્ચેના આ વલણથી આંધ્રપ્રદેશ અને કર્ણાટકના રાજકીય વર્તુળોમાં ભારે ચર્ચા જાગી છે.

​સંપત્તિ અને શેર ટ્રાન્સફરનો વિવાદ કોર્ટ સુધી પહોંચ્યો છે

નોંધનીય છે કે, વાય.એસ. જગન મોહન રેડ્ડી અને વાય.એસ. શર્મિલા વચ્ચે છેલ્લા કેટલાક સમયથી અબજો રૂપિયાની કૌટુંબિક સંપત્તિ અને સરસ્વતી પાવર એન્ડ સિમેન્ટ્સના શેર્સના વિભાજનને લઈને કાનૂની જંગ ચાલી રહ્યો છે. જગન રેડ્ડીએ નેશનલ કંપની લો ટ્રિબ્યુનલ (NCLT)માં બહેન શર્મિલા અને માતા વિજયમ્મા સામે શેર ટ્રાન્સફર રદ કરવા અરજી પણ કરેલી છે.

​પરિવારનો આ આંતરિક અને રાજકીય વિરોધ હવે એટલી હદે વકરી ચૂક્યો છે કે શુભ પ્રસંગોમાં પણ બંને પક્ષો વચ્ચેનું અંતર સ્પષ્ટપણે સપાટી પર આવી ગયું છે.