ઇસ્લામાબાદ: પાકિસ્તાન સરકાર આર્થિક કટોકટીમાંથી બહાર આવવા માટે ડોનાલ્ડ ટ્રમ્પના પરિવારની કંપની 'વર્લ્ડ લિબર્ટી ફાઇનાન્સિયલ' (WLF) સાથે મળીને ડિજિટલ એસેટ્સ અને ક્રિપ્ટોકરન્સી સેક્ટરમાં જે મોટું રોકાણ લાવવાની તૈયારી કરી રહી હતી, તેને કરાચી સ્થિત જાણીતા ઇસ્લામિક વિદ્વાન મુફ્તી મોહમ્મદ તકી ઉસ્માનીના ફતવાને કારણે મોટો ઝટકો લાગ્યો છે. મુફ્તી ઉસ્માનીએ બિટકોઈન, એથેરિયમ અને યુએસડીટી (USDT) જેવી ડિજિટલ કરન્સીને ઈસ્લામિક કાયદા મુજબ 'હરામ' જાહેર કરી છે, જેનાથી પાકિસ્તાની જનતામાં રોકાણ સામે ભારે અસમંજસ ફેલાઈ ગઈ છે.

પાકિસ્તાની અર્થતંત્રને મજબૂત કરવાના ભાગરૂપે વડાપ્રધાન શાહબાઝ શરીફ અને સેના પ્રમુખ આસિમ મુનીર આ ટેક્નોલોજીને પ્રોત્સાહન આપી રહ્યા હતા. આ ડીલ હેઠળ અમેરિકન પ્રમુખ ડોનાલ્ડ ટ્રમ્પના 'USD1' સ્ટેબલકોઈનનો પાકિસ્તાનમાં પેમેન્ટ સિસ્ટમ તરીકે ઉપયોગ કરવાનો પ્લાન હતો. જોકે, દારુલ ઉલૂમ કરાચી દ્વારા જાહેર કરાયેલા આ ફતવાને કારણે હવે આર્થિક ફાયદા કરતા ધાર્મિક માન્યતાઓને લોકો વધુ પ્રાધાન્ય આપી રહ્યા છે, જે ટ્રમ્પ પરિવારની કંપનીની વૈશ્વિક પહોંચ અને બિઝનેસ મોડેલ માટે પણ એક પડકારરૂપ સ્થિતિ છે.

આ ફતવો કાયદાકીય રીતે બાધ્યકારી નથી, પરંતુ પાકિસ્તાનના સામાજિક માળખામાં ધાર્મિક આદેશોનું વજન ખૂબ વધારે હોવાથી સ્થાનિક સ્તરે ક્રિપ્ટોકરન્સીના સ્વીકારમાં મોટો ઘટાડો આવવાની સંભાવના છે. રાજદ્વારી વ્યૂહનીતિના ભાગરૂપે જોવાયેલી આ ડીલ હવે જો નિષ્ફળ જશે, તો તે માત્ર આર્થિક જ નહીં, પરંતુ ટ્રમ્પ વહીવટીતંત્ર અને પાકિસ્તાન વચ્ચેના બિઝનેસ સંબંધો પર પણ લાંબા ગાળે નકારાત્મક અસર કરી શકે છે.

હવે પાકિસ્તાન સરકાર આ ધાર્મિક અવરોધને દૂર કરવા માટે કોઈ મધ્યમ માર્ગ કાઢે છે કે પછી ક્રિપ્ટોના આ પ્રોજેક્ટને પડતો મૂકે છે, તે જોવું રસપ્રદ રહેશે. એક તરફ આર્થિક સ્થિરતા અને બીજી તરફ ધાર્મિક કઠોરતા વચ્ચે ફસાયેલી પાકિસ્તાનની આ મુહિમ હવે કઈ દિશામાં આગળ વધશે, તે આવનારા સમયમાં આર્થિક અને રાજકીય બંને સ્તરે સ્પષ્ટ થશે. ટ્રમ્પ પરિવાર માટે પણ આ સ્થિતિ એક આંતરરાષ્ટ્રીય બિઝનેસ આંચકા સમાન બની રહી છે.