મુંબઈ: વૈશ્વિક બજારમાં ચાલી રહેલી મોટી હલચલની અસર આજે ભારતીય બજારમાં સોના અને ચાંદીના ભાવ પર સ્પષ્ટપણે જોવા મળી છે. મંગળવારે સોના અને ચાંદીના ભાવમાં 2 ટકા જેટલો મોટો ઘટાડો નોંધાયો છે. મલ્ટી કોમોડિટી એક્સચેન્જ (MCX) પર સોનાનો ભાવ ઘટીને ₹1,50,600 પ્રતિ 10 ગ્રામ પર પહોંચી ગયો છે, જે અગાઉના બંધ ભાવ કરતા ₹1,121 જેટલો ઓછો છે.
ચાંદીમાં પણ ગાબડું
માત્ર સોનું જ નહીં, પણ ચાંદીના ભાવમાં પણ મોટો ઘટાડો જોવા મળ્યો છે. ચાંદી વાયદો 1.75 ટકા અથવા ₹4,224 ઘટીને ₹2,37,600 પ્રતિ કિલો પર ટ્રેડ થઈ રહ્યો હતો. દિવસ દરમિયાન ચાંદીમાં ₹2,36,600 સુધીનો નીચલો સ્તર જોવા મળ્યો હતો. નિષ્ણાતોનું કહેવું છે કે ઊંચા સ્તરે પ્રોફિટ બુકિંગ અને આંતરરાષ્ટ્રીય દબાણને કારણે કિંમતી ધાતુઓના ભાવ નીચે આવ્યા છે.
ક્રૂડ ઓઈલ અને ભૂરાજકીય તણાવની અસર
બજારમાં આ ઘટાડા પાછળનું મુખ્ય કારણ અમેરિકા અને ઈરાન વચ્ચે ચાલી રહેલી તણાવપૂર્ણ સ્થિતિ છે. એક તરફ શાંતિ વાર્તાના પ્રયાસો થઈ રહ્યા છે, તો બીજી તરફ ક્રૂડ ઓઈલના ભાવ ફરી $111 પ્રતિ બેરલને પાર કરી ગયા છે. અમેરિકાએ ઈરાનના તે દરખાસ્તને ફગાવી દીધી છે જેમાં હોર્મુઝની સામુદ્રધુની ફરી ખોલવાની વાત હતી. આ અસ્થિરતાને કારણે રોકાણકારો અત્યારે સાવચેતીભર્યું વલણ અપનાવી રહ્યા છે.
શું કહે છે નિષ્ણાતો?
કોમોડિટી માર્કેટના નિષ્ણાતોના મતે, સોના માટે ₹1,52,000 એક મજબૂત અવરોધ (Resistance) છે. જો ભાવ ₹1,51,000 ની નીચે જશે, તો હજુ વધુ ઘટાડો જોવા મળી શકે છે. જોકે, લાંબા ગાળાના રોકાણકારો માટે ગભરાવાની જરૂર નથી, કારણ કે છેલ્લા એક વર્ષમાં ડોલરના ટર્મમાં સોનાએ 40 ટકા અને ચાંદીએ રોકાણકારોના નાણાં બમણા કરતા પણ વધુ એટલે કે 125 ટકા વળતર આપ્યું છે. અત્યારે બજારમાં નવી લેવાલી કરતા 'થોભો અને રાહ જુઓ'ની નીતિ અપનાવવી હિતાવહ છે.