નવી દિલ્હી : દેશમાં E20 ઇંધણના વધતા વ્યાપ વચ્ચે જૂના વાહનોના ચાલકોની ચિંતાને ધ્યાનમાં રાખીને કેન્દ્ર સરકાર દ્વારા ટૂંક સમયમાં પેટ્રોલ પંપો પર E10 પેટ્રોલ પાછું લાવવા માટે ઓક્ટેન 95 જેવા પ્રીમિયમ ઇંધણને E10 માં રૂપાંતરિત કરવાના વિકલ્પ પર ગંભીરતાથી વિચારણા કરવામાં આવી રહી છે, જેથી અલગ સ્ટોરેજ અને ઇન્ફ્રાસ્ટ્રક્ચર ઊભું કરવાની સમસ્યામાંથી છુટકારો મેળવી શકાય. મીડિયા સૂત્રોના અહેવાલો મુજબ, ઇન્ડિયન ઓઇલનું XP95, BPCLનું SPEED અને HPCLનું power95 જેવા પ્રીમિયમ ઇંધણમાં ઇથેનોલનું પ્રમાણ ઘટાડીને તેને E10 સ્ટાન્ડર્ડ મુજબ તૈયાર કરવાની યોજના છે, જે દેશભરના ૯૦,૦00થી વધુ પંપો પર સરળતાથી ઉપલબ્ધ થઈ શકશે.

આ સમગ્ર યોજનાની વિગતવાર રજૂઆત કરતા સૂત્રોએ જણાવ્યું છે કે સામાન્ય પેટ્રોલમાં 91 RON ઓક્ટેન રેટિંગ હોય છે જ્યારે પ્રીમિયમ પેટ્રોલમાં 95 RON હોવા ઉપરાંત ખાસ ડિટર્જન્ટ એડિટિવ્સ હોય છે જે એન્જિનના વાલ્વ અને ફ્યુઅલ ઇન્જેક્ટરની અંદર કાર્બન જમા થવા દેતા નથી અને માઇલેજમાં પણ સામાન્ય વધારો કરે છે. ફેડરેશન ઓફ ઓલ ઇન્ડિયા પેટ્રોલિયમ ટ્રેડર્સના રાષ્ટ્રીય પ્રવક્તા મોન્ટી સેહગલે જણાવ્યું હતું કે ઓઇલ માર્કેટિંગ કંપનીઓ માટે 10 ટકા ઇથેનોલ સાથેનું 95 ઓક્ટેન બ્રાન્ડેડ ઇંધણ પૂરું પાડવું તદ્દન સરળ છે કારણ કે તેમાં અલગથી કોઈ ડિસ્પેન્સિંગ યુનિટ કે નવી ટાંકી બદલવાની જરૂર પડતી નથી.

હાલમાં દિલ્હી જેવા શહેરોમાં નિયમિત પેટ્રોલની સરખામણીએ પ્રીમિયમ પેટ્રોલ 8 થી 13 રૂપિયા મોંઘું વેચાઈ રહ્યું છે, ત્યારે જો આ પ્રીમિયમ ઇંધણને E10 માં રૂપાંતરિત કરવામાં આવે તો તેની કિંમત કેટલી રહેશે તે અંગે હજુ સુધી સત્તાવાર સ્પષ્ટતા કરવામાં આવી નથી, પરંતુ તે ઇથેનોલ-મુક્ત XP100 (જેની કિંમત આશરે 167.35 રૂપિયા પ્રતિ લિટર છે) કરતા ઘણું સસ્તું સાબિત થશે તે નિશ્ચિત છે. જૂના વાહનોના માલિકો દ્વારા લાંબા સમયથી નિયમિત E20 પેટ્રોલ સામે વ્યક્ત કરવામાં આવી રહેલા ખચકાટ અને અસંતોષને દૂર કરવા માટે સરકારનું આ પગલું અત્યંત રાહતરૂપ સાબિત થઈ શકે તેમ છે.

આગામી સમયમાં ઓઇલ કંપનીઓ અને પેટ્રોલિયમ મંત્રાલય વચ્ચેની બેઠકો બાદ આ પ્રસ્તાવ પર આખરી મહોર લાગવાની સંભાવના છે, જેનાથી ગ્રાહકોને તેમની વાહનની જરૂરિયાત મુજબ યોગ્ય ઇંધણ પસંદ કરવાનો વધુ એક સારો વિકલ્પ મળી રહેશે. સરકારે લીધેલા આ સંભવિત નિર્ણયોથી વાહનચાલકોને એન્જિનની દીર્ઘાયુ જાળવી રાખવામાં મોટી મદદ મળશે અને ઇંધણ ક્ષેત્રે ચાલી રહેલા બદલાવો વધુ સરળ બનશે.