બેંગલુરુ : દેશમાં ઇબોલા વાયરસને લઈને ફેલાયેલા ડરના માહોલ વચ્ચે આજે કર્ણાટક સરકાર તરફથી ખૂબ જ રાહતદાયક સમાચાર સામે આવ્યા છે. કર્ણાટકના આરોગ્ય પ્રધાન દિનેશ ગુંડુ રાવે સત્તાવાર રીતે જાહેરાત કરી છે કે બેંગલુરુમાં નોંધાયેલો શંકાસ્પદ ઇબોલાનો કેસ લેબોરેટરી પરીક્ષણ બાદ 'નેગેટિવ' આવ્યો છે. જીવલેણ ઇબોલા વાયરસને લઈને સમગ્ર વિશ્વમાં ચિંતાનું વાતાવરણ છે, ત્યારે આ રિપોર્ટ નેગેટિવ આવતા ભારતે મોટી રાહત અનુભવી છે.
શું હતો સમગ્ર મામલો?
તાજેતરમાં યુગાન્ડાથી ભારત આવેલી 28 વર્ષીય એક યુવતીમાં શરીરમાં દુખાવો જેવા ઇબોલાના હળવા લક્ષણો જોવા મળ્યા હતા. સાવચેતીના પગલા તરીકે તંત્રએ તાત્કાલિક તેને બેંગલુરુની રાજ્ય સંચાલિત હોસ્પિટલમાં આઇસોલેશનમાં ખસેડી હતી. યુવતીના બ્લડ સેમ્પલ પુણે સ્થિત નેશનલ ઇન્સ્ટિટ્યૂટ ઓફ વાયરોલોજી (NIV) ખાતે મોકલવામાં આવ્યા હતા. હોસ્પિટલમાં સારવાર દરમિયાન યુવતીની સ્થિતિ સ્થિર રહી હતી અને હવે પરીક્ષણ પરિણામો નેગેટિવ આવતા તમામ આશંકાઓ પર પૂર્ણવિરામ મુકાયું છે.
આરોગ્ય વિભાગની સતર્કતા
મંત્રીએ નાગરિકોને અપીલ કરી છે કે ગભરાવાની જરૂર નથી અને માત્ર સત્તાવાર માહિતી પર જ વિશ્વાસ રાખવો. વર્લ્ડ હેલ્થ ઓર્ગેનાઇઝેશન (WHO) ની ચેતવણી બાદ કર્ણાટકનું આરોગ્ય વિભાગ અત્યંત સતર્ક છે. પ્રભાવિત દેશોમાંથી આવતા મુસાફરો માટે 21 દિવસના હેલ્થ મોનિટરિંગ અને સેલ્ફ-રિપોર્ટિંગના નિયમો ફરજિયાત બનાવવામાં આવ્યા છે.
તૈયારીઓના ભાગરૂપે સરકારે બેંગલુરુની રાજીવ ગાંધી ઇન્સ્ટિટ્યૂટ ઓફ ચેસ્ટ ડિસીઝ (RGICD) ને આઇસોલેશન સેન્ટર તરીકે તૈયાર રાખ્યું છે, જ્યારે અન્ય હોસ્પિટલોને પણ ક્વોરેન્ટાઇન અને સારવાર માટે સુસજ્જ કરવામાં આવી છે. રાજ્યભરમાં રેપિડ રિસ્પોન્સ ટીમ્સ (RRTs) સતત દેખરેખ રાખી રહી છે જેથી ભવિષ્યમાં કોઈપણ શંકાસ્પદ કેસની વહેલી તકે ઓળખ કરી શકાય. હાલ આ ઘટના બાદ સમગ્ર રાજ્યમાં તંત્રએ સુરક્ષા વ્યવસ્થાને વધુ કડક બનાવી છે.