નવી દિલ્હી : વિદેશમાં બેંક એકાઉન્ટ ધરાવતા, મિલકત ખરીદનારા કે ત્યાંથી આવક મેળવતા ભારતીય કરદાતાઓ માટે એક અત્યંત મહત્વના સમાચાર સામે આવ્યા છે. સેન્ટ્રલ બોર્ડ ઓફ ડાયરેક્ટ ટેક્સીસ (CBDT) દ્વારા કરદાતાઓની સુવિધા અને પારદર્શિતા વધારવા માટે આવકવેરા (Income Tax) ના ઈ-ફાઇલિંગ પોર્ટલ પર એક નવું સીમાચિહ્નરૂપ ફિચર લાઈવ કરવામાં આવ્યું છે. હવેથી પાત્ર કરદાતાઓના વાર્ષિક માહિતી નિવેદન એટલે કે AIS (Annual Information Statement) માં તેમની વિદેશી સંપત્તિ અને વિદેશમાંથી થતી આવકની વિગતો પણ ઓટોમેટિક પ્રદર્શિત કરવામાં આવશે.

વૈશ્વિક ફ્રેમવર્ક હેઠળ ભારત સરકારને મળી ગુપ્ત વિગતો

CBDT દ્વારા જારી કરાયેલા સત્તાવાર નિવેદન અનુસાર, આ નવી વિગતો ઓટોમેટિક એક્સચેન્જ ઓફ ઇન્ફર્મેશન (AEOI) ફ્રેમવર્ક અંતર્ગત વિવિધ દેશો પાસેથી પ્રાપ્ત માહિતીના આધારે ઉપલબ્ધ કરાવવામાં આવી છે. આ વૈશ્વિક સમજૂતી હેઠળ ભારતને વિદેશમાં રહેલા ભારતીય નાગરિકોના નાણાકીય વ્યવહારોની માહિતી આપોઆપ મળી જાય છે. હવે આ ડેટાને સીધો કરદાતાના AIS ફોર્મ સાથે લિંક કરી દેવામાં આવ્યો છે, જેથી કરદાતા પોતે જ રિટર્ન ફાઈલ કરતા પહેલા પોતાની વૈશ્વિક સંપત્તિની ચકાસણી કરી શકે.

આ કોઈ તપાસ નથી પણ કરદાતાઓની સુવિધા માટેનો પ્રયાસ

આવકવેરા વિભાગે સ્પષ્ટતા કરતા જણાવ્યું છે કે, આ પહેલનો હેતુ કરદાતાઓને ડરાવવાનો કે તેમની કોઈ તપાસ (Investigation) કરવાનો નથી, પરંતુ તેમને નિયમોનું પાલન કરવામાં મદદ કરવાનો છે.

·         ભૂલોમાં થશે ઘટાડો: ઘણીવાર કરદાતાઓ અજાણતા અથવા માહિતીના અભાવે પોતાના ઇન્કમટેક્સ રિટર્ન (ITR) માં વિદેશી આવક દર્શાવવાનું ભૂલી જતા હોય છે.

·         ચોકસાઈમાં સુધારો: પોર્ટલ પર જ વિગતો દેખાવાને કારણે અજાણતા થતી રિપોર્ટિંગ ભૂલો નહિવત થઈ જશે અને રિટર્નની ચોકસાઈમાં મોટો સુધારો થશે.

ટેક્સ સિસ્ટમ વધુ સરળ અને પારદર્શક બનશે

સરકારના આ ડિજિટલ કદમથી દેશની ટેક્સ સિસ્ટમ વધુ સરળ, અનુકૂળ અને અત્યંત પારદર્શક (Transparent) બનશે. વિદેશી સંપત્તિની વિગતો અગાઉથી જ સ્ક્રીન પર ઉપલબ્ધ હોવાને કારણે કરદાતા કાયદેસર રીતે પોતાની સાચી આવક જાહેર કરી શકશે, જેનાથી ભવિષ્યમાં આવકવેરા વિભાગ તરફથી મળતી સ્કૂટિની નોટિસો કે દંડનીય કાર્યવાહીથી તેઓ આસાનીથી બચી શકશે.