નવી દિલ્હી : નવેમ્બર ૨૦૨૫માં દિલ્હીના લાલ કિલ્લા ખાતે થયેલા ભયાનક કાર બોમ્બ બ્લાસ્ટના કેસમાં તપાસ એજન્સી NIA દ્વારા વધુ ત્રણ આતંકીઓ વિરુદ્ધ વિશેષ અદાલતમાં સપ્લીમેન્ટ્રી ચાર્જશીટ દાખલ કરવામાં આવી છે. આ કેસમાં અત્યાર સુધીમાં કુલ ૧૩ આરોપીઓની ઓળખ થઈ ચૂકી છે, જેમાં જમ્મુ-કાશ્મીરના જમીર અહેમદ અહંગર, તુફૈલ અહેમદ ભટ અને ફરાર આતંકી મુઝફ્ફર અહેમદ ઉર્ફે ફરાજનો સમાવેશ થાય છે. આ ૧૧ નિર્દોષ લોકોના જીવ લેનાર આ આતંકવાદી કૃત્યનું નેટવર્ક હરિયાણા સુધી વિસ્તરેલું હોવાનું તપાસમાં બહાર આવ્યું છે.

ચોંકાવનારી વાત એ છે કે, ફરાર આરોપી મુઝફ્ફર અહેમદ વ્યવસાયે MBBS અને MD ડોક્ટર છે, જે પ્રતિબંધિત સંગઠન ‘AGuH Interim’નો સ્થાપક સભ્ય છે. તેણે હરિયાણાની અલ-ફલાહ યુનિવર્સિટીમાં ગુપ્ત અડ્ડો બનાવીને ઘાતક TATP-આધારિત IED બોમ્બ બનાવવાની તાલીમ આપી હતી. અન્ય આરોપીઓ જમીર અહંગર અને તુફૈલ ભટ હથિયારો, ફંડિંગ અને AK-47 જેવા ઘાતક હથિયારો પહોંચાડવામાં મુખ્ય ભૂમિકા ભજવતા હતા, જેનો પુરાવો NIA ને ડિજિટલ ટ્રેકિંગ અને બેંક વ્યવહારો દ્વારા મળ્યો છે.

NIA એ આ સમગ્ર કાવતરાને તોડી પાડવા માટે જિયો-લોકેશન મેપિંગ અને અત્યાધુનિક ડિજિટલ પુરાવાઓનો સહારો લીધો છે. યુએપીએ (UAPA) અને ભારતીય ન્યાય સંહિતા (BNS) હેઠળ નોંધાયેલા આ ગંભીર ગુનામાં એજન્સીએ તપાસનો વ્યાપ વધારી દીધો છે. મુખ્ય સૂત્રધાર ડો. ઉમર ઉન નબીના મૃત્યુ બાદ, આ ત્રણ નવા આતંકીઓની ચાર્જશીટ એ આતંકવાદી સંગઠનોની કમર તોડવા માટેનું મહત્વનું કદમ માનવામાં આવે છે.

આ કેસની તપાસ હવે નિર્ણાયક તબક્કે છે, જ્યાં ફરાર આરોપી મુઝફ્ફર અહેમદને પકડવા માટે દેશવ્યાપી સર્ચ ઓપરેશન ચલાવવામાં આવી રહ્યું છે. આતંકી નેટવર્કને મળતી આર્થિક મદદ અને સરહદ પારથી મળેલા આદેશોનું પગેરું શોધવા માટે એજન્સીઓ સતત પ્રયત્નશીલ છે. સરકાર અને સુરક્ષા એજન્સીઓ આ બ્લાસ્ટમાં સામેલ દરેક વ્યક્તિને ન્યાયના કઠેડામાં લાવવા માટે સંપૂર્ણપણે કટિબદ્ધ છે.