અમદાવાદ :દેશભરમાં ચોમાસાનો વરસાદ હવે મુશ્કેલીનું કારણ બની રહ્યો છે. ભારતીય હવામાન વિભાગએ દેશના વિવિધ રાજ્યો માટે લાલ, નારંગી અને પીળી ચેતવણી જારી કરી છે. ખાસ કરીને દિલ્હી અને હરિયાણાના અનેક જિલ્લાઓ માટે 'રેડ એલર્ટ' આપવામાં આવ્યું છે, જ્યાં ભારે વાવાઝોડા, વીજળીના કડાકા અને અતિવૃષ્ટિની શક્યતા છે.

હવામાન વિભાગે રાજ્યમાં બે દિવસ વરસાદની આગાહી કરી છે. દક્ષિણ ગુજરાતના નવસારી, વલસાડ, ડાંગ અને દમણમાં ઓરેન્જ એલર્ટ જાહેર કરાયું છે. જ્યારે ભાવનગર, અમરેલી, સુરત, બનાસકાંઠા અને સાબરકાંઠામાં યેલો એલર્ટ છે. દરિયામાં પાંચ દિવસ ભારે પવનની શક્યતા છે. સૌરાષ્ટ્ર-કચ્છમાં 18% ઓછો અને અન્ય જિલ્લાઓમાં 4% વધુ વરસાદ નોંધાયો છે.

હવામાન વિભાગના જણાવ્યા અનુસાર, દિલ્હીના તમામ જિલ્લાઓ અને હરિયાણાના ફરીદાબાદ, કરનાલ, પલવલ, પંચકુલા, પાણીપત અને સોનીપત જેવા જિલ્લાઓમાં 60 કિમી પ્રતિ કલાકની ઝડપે પવન ફૂંકાઈ શકે છે. અહીં 15 મિલીમીટરથી વધુ વરસાદ પડવાની આગાહી કરવામાં આવી છે, જેને કારણે નીચાણવાળા વિસ્તારોમાં પાણી ભરાવાની સમસ્યા થઈ શકે છે.

બીજી તરફ, ઉત્તર પ્રદેશના આગ્રા, ગાઝિયાબાદ, મેરઠ સહિતના વિસ્તારો, ઉત્તરાખંડના દેહરાદૂન, હરિદ્વાર અને કેરળના એર્નાકુલમ જેવા જિલ્લાઓ માટે ઓરેન્જ એલર્ટ છે. આ વિસ્તારોમાં 40-60 કિમીની ઝડપે પવન અને મધ્યમથી ભારે વરસાદ નોંધાઈ શકે છે. આ ઉપરાંત, અરુણાચલ પ્રદેશ અને જમ્મુ-કાશ્મીરના કેટલાક ભાગો પણ આ ચેતવણી હેઠળ છે.

IMD એ સામાન્ય હવામાન ફેરફારો માટે યલો એલર્ટ જારી કર્યું છે. આનો અર્થ એ છે કે હવામાનમાં બદલાવ આવી રહ્યો છે, પરંતુ તાત્કાલિક કોઈ મોટી કુદરતી આપત્તિની શક્યતા ઓછી છે. નાગરિકોને હવામાન વિભાગની સત્તાવાર સૂચનાઓનું પાલન કરવા અને જરૂર વગર ઘરની બહાર ન નીકળવા સલાહ આપવામાં આવી છે. ચોમાસાની આ સિઝનમાં સુરક્ષિત રહેવું ખૂબ જ અનિવાર્ય છે.