મદનપલ્લી: દુષ્કાળગ્રસ્ત રાયલસીમા પ્રદેશનું ભાગ્ય બદલવા અને તેને વિશ્વના નકશા પર વૈશ્વિક ફળોના હબ તરીકે પ્રસ્થાપિત કરવા માટે આંધ્રપ્રદેશ સરકાર દ્વારા એક ઐતિહાસિક ડગલું ભરવામાં આવ્યું છે. આંધ્રપ્રદેશના મુખ્યમંત્રી નારા ચંદ્રબાબુ નાયડુ અને કેન્દ્રીય નાણાં પ્રધાન નિર્મલા સીતારમણે અન્નમય્યા જિલ્લાના મદનપલ્લી ખાતે ₹૧ લાખ કરોડના ખર્ચે સાકાર થનારા 'ગ્લોબલ હોર્ટિકલ્ચર હબ' અને 'ઇન્ડિયન સ્કૂલ ઓફ એગ્રીકલ્ચર'નો ભવ્ય શિલાન્યાસ કર્યો હતો. આ પ્રસંગે રાયલસીમાને 'ગ્લોબલ ફ્રૂટ બાઉલ' બનાવવાના મિશનમાં સહભાગી થવા રિલાયન્સ ઇન્ડસ્ટ્રીઝના એક્ઝિક્યુટિવ ડિરેક્ટર અનંત અંબાણી, નાયબ મુખ્યમંત્રી પવન કલ્યાણ અને મંત્રી નારા લોકેશ પણ ખાસ ઉપસ્થિત રહ્યા હતા.

૪૦ હજાર કરોડનું સરકારી અને ૬૦ હજાર કરોડનું ખાનગી રોકાણ
આ મેગા પ્રોજેક્ટની બ્લુપ્રિન્ટ રજૂ કરતા મુખ્યમંત્રી નાયડુએ જણાવ્યું હતું કે, આ પ્રોજેક્ટ રાયલસીમાના ૧૦ જિલ્લાઓમાં લાગુ કરવામાં આવશે, જેમાં ૫,૮૬૦ ગામડાઓને ૨૦૧ ક્લસ્ટરમાં વિભાજિત કરાયા છે. આ મિશન અંતર્ગત સરકાર ₹૪૦,૦૦૦ કરોડનું સીધું રોકાણ કરશે, જ્યારે ₹૬૦,૦૦૦ કરોડનું ખાનગી રોકાણ એકત્ર કરવામાં આવશે. વધારાની ૬,૦૦,૦૦૦ એકર જમીનને બાગાયતી ખેતી હેઠળ લાવીને ખેડૂતોને આધુનિક પ્રોસેસિંગ યુનિટ્સ અને આંતરરાષ્ટ્રીય બજારો સાથે સીધા જોડવામાં આવશે.

રાયલસીમાના ખેડૂતો જમીનમાંથી સોનું ઉગાડશે
જાહેર સભાને સંબોધતા ચંદ્રબાબુ નાયડુએ વિશ્વાસ વ્યક્ત કર્યો હતો કે, વડાપ્રધાન નરેન્દ્ર મોદી અને કેન્દ્રીય નાણાં મંત્રીના સહયોગથી આ શુષ્ક પ્રદેશનું આર્થિક ચિત્ર બદલાઈ જશે. તેમણે ઉમેર્યું કે, "રાયલસીમાની જમીનમાં અપાર ક્ષમતા છે. યોગ્ય સિંચાઈ અને માર્કેટિંગ પૂરું પાડવામાં આવે તો અહીંના ખેડૂતો સફરજન, સ્ટ્રોબેરી, કેળા, એવોકાડો, કીવી અને ખજૂર જેવા મૂલ્યવાન પાકો ઉગાડીને જમીનમાંથી સોનું પેદા કરશે અને વિશાળ સંપત્તિનું નિર્માણ કરશે."

આ સમગ્ર પ્રોજેક્ટ "સીડ-ટુ-શિપમેન્ટ" મોડેલ પર કાર્ય કરશે. ખેડૂતોને કોલ્ડ સ્ટોરેજ, પ્રોસેસિંગ અને ટ્રાન્સપોર્ટેશનની સીધી સુવિધા મળશે. પાણીની બચત માટે ટપક સિંચાઈ અને આબોહવાના જોખમો સામે રક્ષણ મેળવવા માટે AI આધારિત કૃષિ ટેકનોલોજીનો ઉપયોગ કરાશે, જેથી ખેડૂતોને પાકના વાજબી ભાવ મળી રહે.

પાણીની કટોકટી દૂર કરવા માટે સરકાર આગામી ત્રણ વર્ષમાં ₹૩૫,૦૦૦ કરોડના ખર્ચે ૩૬ પ્રાથમિકતા વાળા સિંચાઈ પ્રોજેક્ટ્સ પૂર્ણ કરશે. જેમાં હાંદ્રી-નીવા અને ગેલેરુ-નગરી જેવા કેનાલ પ્રોજેક્ટ્સને ઝડપથી આગળ ધપાવવામાં આવશે. દક્ષિણના રાજ્યો વચ્ચે સંકલન અને નદીઓના આંતરજોડાણ દ્વારા રાયલસીમાને કાયમી ધોરણે જળસમૃદ્ધ બનાવવાની જાહેરાત કરવામાં આવી હતી.