દેશમાં રેશન એટલે કે સસ્‍તું અનાજ લેવાની વ્‍યવસ્‍થાને સરળ બનાવવા માટે સરકાર સતત ડિજિટલ સુવિધાઓ પર કામ કરી રહી છે. તાજેતરમાં જ સરકારે એક એવી સુવિધાનો અમલ શરૂ કર્યો છે, જેના દ્વારા હવે રેશન કાર્ડ ધારકોએ એક જ રેશન દુકાન પરથી અનાજ લેવાની જરૂર નથી. હવે તમે તમારી સુવિધા મુજબ કોઈપણ રેશનની દુકાન પરથી અલગ-અલગ અનાજ લઈ શકો છો, એટલે કે હવે તમે ક્‍યાંકથી ઘઉં તો ક્‍યાંકથી ચોખા લઈ શકશો.

આ ફેરફારની સૌથી ખાસ વાત એ છે કે હવે તમારે રેશન લેવા માટે લાંબી લાઈનોમાં ઉભા રહેવાની, મશીનમાં અંગૂઠો ન લાગવાની કે દુકાનમાં અનાજ ઉપલબ્‍ધ ન હોવાને કારણે પૂરું રેશન ન મળવા જેવી મુશ્‍કેલીઓનો સામનો કરવો નહીં પડે. હવે જરૂરિયાત મુજબ, તમે કોઈ દુકાન પરથી ઘઉં અને કોઈ દુકાન પરથી ચોખા લઈ શકો છો. આ માહિતીની જાણકારી સોશિયલ મીડિયા પર કેન્‍દ્રીય રાજ્‍ય મંત્રી બી. એલ. વર્માએ શેર કરી છે.

કેન્‍દ્રીય સરકારે જણાવ્‍યું છે કે સરકાર વન નેશન વન રેશન કાર્ડ (ONORC) યોજના હેઠળ રેશન વિતરણને સરળ બનાવવા માટે કામ કરી રહી છે. આ યોજના દ્વારા રેશન કાર્ડ ધારકો પોતાના રેશનનો અલગ-અલગ હિસ્‍સો પોતાની સુવિધા મુજબ અલગ-અલગ જગ્‍યાએથી લઈ શકે છે. દેશના કોઈપણ ભાગમાંથી તમે આ સુવિધા મેળવી શકો છો.

આ સુવિધા બિલકુલ એટીએમ (ATM)ની જેમ કામ કરે છે. જેમ તમે તમારી જરૂરિયાત મુજબ કોઈપણ એટીએમમાંથી પૈસા ઉપાડી લો છો, તેવી જ રીતે રેશન લેવા માટે તમે દેશના કોઈપણ ખૂણેથી પોતાનું અનાજ મેળવી શકો છો.

વન નેશન વન રેશન કાર્ડ યોજનાનો સૌથી મોટો ફાયદો પ્રવાસી મજૂરોના પરિવારોને મળશે. હવે તેમણે રેશન લેવા માટે પોતાના ગામની રેશન દુકાન સાથે જોડાયેલા રહેવાની જરૂર નથી, પરંતુ તેઓ દેશના કોઈપણ રાજ્‍ય કે શહેરમાં રહીને પોતાના હિસ્‍સાનું રેશન આધાર અને બાયોમેટ્રિક દ્વારા મેળવી શકે છે.