રામાયણ છે કે મજાક! સુગ્રિવના પોસ્ટમાં મોટી ચૂકઃ ચશ્મા પહેરેલ વાનર દેખાયોઃ લોકોમાં નારાજી
ત્રેતાયુગમાં ચશ્મા? મહાકાવ્ય શ્રી રામાયણ કથા ગઇ કાલે રિલિઝ થઇ છે
મુંબઇ તા.૨૬: રણબીર કપૂર, સાઈ પલ્લવી અને યશ અભિનીત ફિલ્મ રામાયણ રિલીઝ થાય તે પહેલાં જ, રામાયણ પર આધારિત અન્ય એક ફિલ્મ સિનેમાઘરોમાં આવવાની છે. મહાકાવ્ય શ્રી રામાયણ કથા નામની આ ફિલ્મમાં સોશિયલ મીડિયા ફેમ અંજાલિ અરોરા સાથે દેવ શર્મા અને રજનીશ દુગ્ગલ મુખ્ય ભૂમિકામાં છે. આ ફિલ્મ ૨૫ સપ્ટેમ્બર, ૨૦૨૬ના રોજ રિલીઝ થઈ હતી. તેના એક દિવસ પહેલા, ગુરુવારે, નિર્માતાઓએ અન્ય પાત્રોના પોસ્ટર બહાર જાહેર હતા, જેમાં સુગ્રીવના પોસ્ટરનો પણ સમાવેશ થતો હતો. આ ચોક્કસ પોસ્ટરમાં એક કલાકાર ચશ્મા પહેરેલો જોવા મળે છે. સોશિયલ મીડિયા યુઝરએ આ બાબત પર રમુજી પ્રતિક્રિયાઓ આપી હતી.
સુગ્રીવના પોસ્ટરમાં ચશ્મા જોવા મળતા જ તે તરત જ સોશિયલ મીડિયા યુઝરના ધ્યાન પર આવ્યું. એક યુઝરે ટિપ્પણી કરી, તમારે ચશ્માને ઍડિટ કરીને દૂર કરવા જોઈતા હતા; થોડી શરમ રાખો ભાઈ. જો તમે ફિલ્મ રિલીઝ કરવાનું નક્કી કર્યું હોય, તો ઓછામાં ઓછું નાની વિગતો પર તો ધ્યાન આપો. અન્ય એક ઇન્સ્ટાગ્રામ યુઝરે લખ્યું, ત્રેતાયુગમાં ચશ્મા કોણ પહેરે છે? વધુ એક યુઝરે ટિપ્પણી કરી, ત્રેતાયુગમાં પહેલીવાર ચશ્મા જોયા.
ફિલ્મનું ટીઝર રિલીઝ થયા ત્યારથી જ તેના કાસ્ટિંગ (પાત્રોની પસંદગી) વિશે સોશિયલ મીડિયા પર ચર્ચા ચાલી રહી છે. ઘણા લોકોએ ખાસ કરીને માતા સીતા તરીકે અંજાલિ અરોરાની પસંદગી અંગે પ્રતિક્રિયા આપી હતી. ‘કચા બદામ‘ ગીત પરનો તેનો ડાન્સ વીડિયો વાયરલ થયા પછી અંજલિ અરોરા લોકપ્રિય બની હતી. હવે તે ફિલ્મમાં માતા સીતાની ભૂમિકા ભજવી રહી છે.
ફિલ્મના ટ્રેલર લોન્ચ દરમિયાન, અંજાલિ અરોરાએ સોશિયલ મીડિયા પર થઈ રહેલા ટ્રોલિગ વિશે પણ વાત કરી હતી. તેણે કહ્યું, ના, તેનાથી મને કોઈ દુઃખ નથી થયું, કારણ કે અમે જાહેર હસ્તીઓ છીએ અને જનતાને અમારું મૂલ્યાંકન કરવાનો અધિકાર આપ્યો છે. અમને હકારાત્મક કે નકારાત્મક દ્રષ્ટિકોણથી જોવાનો તેમનો અધિકાર છે. દરેકને અમને પસંદ કરવાનો કે નાપસંદ કરવાનો અધિકાર છે. અમે કલાકારો છીએ; અમને જે પણ ભૂમિકા આપવામાં આવે, અમે તેને પૂરી નિષ્ઠા અને ૧૦૦ ટકા સમર્પણ સાથે ભજવીશું. તેણે ઉમેર્યું, જ્યારે ફિલ્મ લોકો સમક્ષ રજૂ થાય છે, ત્યારે તેને કેવી રીતે જોવી કે સમજવી તે તેમનો નિર્ણય હોય છે. મેં માતા સીતાની ભૂમિકા ભજવી છે. હવે, ટ્રેલર જોયા પછી, શું તમને એવું લાગ્યું કે હું એ જ અંજાલિ છું જેને તમે સોશિયલ મીડિયા પર જુઓ છો? મારો એકમાત્ર ઉદ્દેશ્ય એ છે કે જ્યારે પ્રેક્ષકો ફિલ્મ જુએ, ત્યારે તેઓ મારા અંગત જીવન અને મારા વ્યક્તિત્વને અલગ રાખે.
(10:13 AM IST)
છેલ્લા 8 દિવસમાં સૌથી લોકપ્રિય 
