અયોધ્‍યા તા.૨૪: ભવ્‍ય રામ મંદિરમાં શ્રદ્ધાળુઓ દ્વારા આપવામાં આવતા દાનની રકમમાં ગેરરીતિ અને ચંદા ચોરીના વિવાદાસ્‍પદ કેસમાં સ્‍પેશિયલ ઇન્‍વેસ્‍ટિગેશન ટીમ (SIT) દ્વારા તપાસ કરવામાં આવી રહી છે. તપાસકર્તા ટીમે ધરપકડ કરાયેલા આઠ આરોપી સામે અદાલતમાં ૭,૦૦૦ પાનાની ચાર્જશીટ રજૂ કરી છે.

તપાસ દરમિયાન ખુલાસો થયો છે કે મંદિરના દાન કેન્‍દ્રમાં રોકડ ગણતરી અને હેન્‍ડલિગ દરમિયાન વ્‍યાપક સ્‍તરે ગોલમાલ કરવામાં આવી હતી. જોકે, સૂત્રોના જણાવ્‍યા અનુસાર આ ચાર્જશીટમાં શ્રી રામ જન્‍મભૂમિ તીર્થ ક્ષેત્ર ટ્રસ્‍ટના પૂર્વ મહાસચિવ ચંપત રાય કે પૂર્વ ટ્રસ્‍ટી અનિલ મિશ્રાનું નામ આરોપી તરીકે સામેલ કરવામાં આવ્‍યું નથી.

લખનઉ ડિવિઝનલ કમિશનર વિજય વિશ્વાસ પંતના અધ્‍યક્ષપણા હેઠળની ૩ સભ્‍યોની એસઆઈટીએ આ મામલે ઊંડાણપૂર્વક તપાસ હાથ ધરી હતી. એસઆઈટી દ્વારા આ કેસ સાથે જોડાયેલા ૧૭૩ સાક્ષીના નિવેદનો નોંધવામાં આવ્‍યાં છે. રોકડ ગણતરી રૂમના સીસીટીવી ફૂટેજ ચકાસતા ૧૦૫ એવી ઘટનાઓ ઘટી છે, જેમાં આરોપીઓ દ્વારા અધિકૃત મંજૂરી વિના રોકડ રકમ ચોરી છૂપે કાઢી લેવામાં આવી કે છુપાવવામાં આવી હતી. આ સાથે નાણાકીય દસ્‍તાવેજો, બેંક ખાતાઓ, ફોરેન્‍સિક ઓડિટ રિપોર્ટ અને આરોપીઓની મિલકત ટ્રેકિંગ સહિતના પુરાવાઓ ચાર્જશીટ સાથે જોડાવામાં આવ્‍યા છે.

આ કૌભાંડમાં સામેલ તમામ ૮ આરોપીઓની ધરપકડ કરી લેવામાં આવી છે. તેમની સામે ભારતીય ન્‍યાય સંહિતા (BNS) ની વિવિધ કલમો તેમજ ભ્રષ્ટાચાર નિવારણ અધિનિયમની કલમ 13(1)(a) હેઠળ ગુનો નોંધી કાર્યવાહી કરવામાં આવી છે. આરોપી તરીકે અવિનાશ શુક્‍લા, અનુકલ્‍પ મિશ્રા, લવકુશ મિશ્રા, મનીષ કુમાર યાદવ, કરુણેશ પાંડે, રમાશંકર મિશ્રા, સુભાષ શ્રીવાસ્‍તવ અને રામ શંકર યાદવ (ઉર્ફે ટીન્નૂ) સામે કેસ નોંધવામાં આવ્‍યો છે. આ સાથે એફઆઈઆરમાં કેટલાક અન્‍ય નામો પણ સામેલ છે