નવી દિલ્હી  :  કોંગ્રેસ સાંસદ અને વિપક્ષી નેતા રાહુલ ગાંધી દ્વારા વડાપ્રધાન નરેન્દ્ર મોદીની વિદેશ નીતિ અને વિદેશી નેતાઓને ગળે લગાવવાની શૈલીની મજાક ઉડાવવી હવે તેમના માટે જ મોટો વિવાદ બની ગઈ છે. એક કાર્યક્રમ દરમિયાન રાહુલે કટાક્ષ કરતા કહ્યું હતું કે વિદેશ નીતિ ફક્ત "નેતાઓને ગળે લગાવવી" નથી અને ત્યારબાદ તેમણે કોંગ્રેસ નેતા સંદીપ દીક્ષિતને ગળે લગાવ્યા હતા, જેના પર દીક્ષિતે "શું તમે મને મેલોની સમજી ગયા?" જેવી ટિપ્પણી કરી હતી. રાહુલે પીએમ મોદી અને અમિત શાહ પર વ્યક્તિગત પ્રહારો કરતા જ ભાજપે તેમની સામે આક્રમક મોરચો ખોલી દીધો છે.

રાહુલ ગાંધીના આ વિવાદિત નિવેદન બાદ ભાજપના સાંસદ નિશિકાંત દુબેએ ભૂતપૂર્વ વડાપ્રધાન ઇન્દિરા ગાંધીની ક્યુબન નેતા ફિડેલ કાસ્ટ્રો સાથે ગળે મળતી ઐતિહાસિક તસવીરો સોશિયલ મીડિયા પર શેર કરી વળતો પ્રહાર કર્યો છે. આ ઉપરાંત, નિશિકાંત દુબેએ સંસદમાં રાહુલ ગાંધી પોતે અચાનક વડાપ્રધાન મોદીને ગળે મળ્યા હતા તે ક્ષણનો ફોટો પણ પોસ્ટ કરીને રાહુલના બેવડા ધોરણો પર સવાલો ઉઠાવ્યા છે. ભાજપ નેતાઓએ ઘેરતા કહ્યું કે વિદેશ નીતિ અને રાજદ્વારી સંબંધોનો અનાદર કરવો એ કોંગ્રેસની જૂની આદત બની ગઈ છે.

આ સમગ્ર વિવાદ વચ્ચે કેન્દ્રીય મંત્રી જે.પી. નડ્ડાએ રાહુલ ગાંધીના વલણની આકરા શબ્દોમાં નિંદા કરતા કહ્યું કે ભારતીય લોકશાહી માટે આવા અપરિપક્વ વિપક્ષી નેતા હોવું એ દુર્ભાગ્યપૂર્ણ છે. રાહુલે પોતાના પ્રવચનમાં એવો પણ દાવો કર્યો હતો કે વિપક્ષના દબાણથી પીએમ મોદી રાત્રે ઊંઘી શકતા નથી અને અમિત શાહ સંસદમાં આવી શક્યા નહોતા. જોકે, ભાજપે આ નિવેદનોને તેમની રાજકીય અસહજતા ગણાવીને પલટવાર ચાલુ રાખ્યો છે, જેનાથી દેશના રાજકારણમાં ગરમાવો આવી ગયો છે.