ભોપાલ, તા. 25: લોકસભામાં વિરોધ પક્ષના નેતા અને કોંગ્રેસના સાંસદ રાહુલ ગાંધી ફરી એકવાર પોતાના જૂના નિવેદનને લઈને કાનૂની અને રાજકીય મુશ્કેલીમાં મુકાયા છે. કેન્દ્રીય મંત્રી શિવરાજ સિંહ ચૌહાણના પુત્ર કાર્તિકેય સિંહ દ્વારા દાખલ કરવામાં આવેલા માનહાનિના કેસમાં રાહુલ ગાંધીએ મધ્ય પ્રદેશ હાઈકોર્ટમાં અરજી દાખલ કરીને દિલગીરી (ખેદ) વ્યક્ત કરી છે. રાહુલે કોર્ટને જણાવ્યું છે કે તેમની ટિપ્પણીનો હેતુ કાર્તિકેય સિંહને ઠેસ પહોંચાડવાનો નહોતો.

શું હતો સમગ્ર વિવાદ?

આ વિવાદ વર્ષ 2018નો છે, જ્યારે મધ્ય પ્રદેશના ઝાબુઆમાં એક ચૂંટણી રેલી દરમિયાન રાહુલ ગાંધીએ તત્કાલીન મુખ્યમંત્રી શિવરાજ સિંહ ચૌહાણના પુત્ર કાર્તિકેય સિંહનું નામ લઈને 'પનામા પેપર્સ લીક' કૌભાંડનો ઉલ્લેખ કર્યો હતો. કાર્તિકેય સિંહે આ આક્ષેપોને તેમની પ્રતિષ્ઠાને નુકસાન પહોંચાડનારા ગણાવીને ભોપાલની વિશેષ સાંસદ-ધારાસભ્ય (MP-MLA) કોર્ટમાં માનહાનિની ફરિયાદ નોંધાવી હતી. નીચલી કોર્ટે આ મામલે રાહુલ ગાંધીને સમન્સ જારી કરીને વ્યક્તિગત રીતે હાજર થવા આદેશ કર્યો હતો.

હાઈકોર્ટના શરણે કોંગ્રેસ નેતા

નીચલી કોર્ટના સમન્સને પડકારતા રાહુલ ગાંધીએ મધ્ય પ્રદેશ હાઈકોર્ટમાં અરજી કરી આ કાનૂની કાર્યવાહી રદ કરવાની માંગ કરી છે. જસ્ટિસ પ્રમોદ કુમાર અગ્રવાલની બેન્ચ સમક્ષ ગુરુવારે થયેલી સુનાવણી પહેલાં દાખલ કરાયેલી આ અરજીમાં રાહુલ ગાંધીના વકીલે સ્પષ્ટતા કરી છે કે પ્રશ્નમાં રહેલી ટિપ્પણીઓ જાણીજોઈને કાર્તિકેય સિંહ વિરુદ્ધ કરવામાં આવી નહોતી. કોર્ટમાં બચાવ પક્ષ તરફથી આ મામલે ખેદ પણ વ્યક્ત કરવામાં આવ્યો છે.

"રાહુલ ગાંધીએ પોતાનું મધ્યમ નામ 'માફ કરશો' રાખવું જોઈએ"

રાહુલ ગાંધીની આ અરજી બહાર આવતા જ ભાજપે તેમના પર આકરા રાજકીય પ્રહારો શરૂ કરી દીધા છે. ભાજપ આઈટી સેલના વડા અમિત માલવિયાએ સોશિયલ મીડિયા પ્લેટફોર્મ 'X' પર ટિપ્પણી કરતા લખ્યું કે, “રાહુલ ગાંધીએ કદાચ 'માફ કરશો' ને પોતાનું મધ્યમ નામ બનાવી લેવું જોઈએ. તેઓ કેટલી વાર બેજવાબદાર નિવેદનો આપીને કોર્ટમાં માફી માંગે છે તેની હવે ગણતરી ખોરવાઈ ગઈ છે.”

માલવિયાએ વધુમાં સવાલ ઉઠાવ્યો કે, જો આ નિવેદન કાર્તિકેય સિંહ વિશે નહોતું, તો ચૂંટણી મંચ પરથી તેમનું નામ કેમ લેવામાં આવ્યું? તેમણે ઉમેર્યું કે વિરોધ પક્ષના નેતા પાસેથી જવાબદારીપૂર્વક વર્તવાની અપેક્ષા રાખવામાં આવે છે, નહીં કે સનસનાટીભર્યા હેડલાઇન્સ મેળવીને પછીથી કોર્ટમાં પાછા હટી જવાની.

હાલમાં હાઈકોર્ટમાં આ મામલે નીચલી કોર્ટના રેકોર્ડ રજૂ કરવામાં આવ્યા છે અને ફરિયાદી પક્ષના વકીલ સંકલ્પ કોચર પણ કોર્ટમાં હાજર રહ્યા હતા. આ કેસ આગામી દિવસોમાં રાહુલ ગાંધીની રાજકીય વિશ્વસનીયતા માટે કેટલો મોટો પડકાર બને છે, તેના પર સૌની નજર રહેશે.