મનીલા :   ફિલિપાઇન્સની રાજધાની મનીલા અચાનક વૈશ્વિક રાજનીતિ અને વ્યૂહાત્મક અડ્ડાનું કેન્દ્ર બની ગયું છે. દક્ષિણ ચીન સમુદ્રના મુખ પર જ ભારત, યુનાઇટેડ સ્ટેટ્સ, જાપાન અને ઓસ્ટ્રેલિયાના વિદેશ પ્રધાનોની ૨૨ જુલાઈની આ ખાસ બેઠકે બેઇજિંગના ચિંતાતુર કરી દીધું છે. માત્ર બે મહિનાના ટૂંકા ગાળામાં ક્વાડ (Quad) દેશોના મંત્રીઓનું ફરી એક ટેબલ પર આવવું એ સાબિત કરે છે કે ઇન્ડો-પેસિફિક ક્ષેત્રમાં ચીનના એકપક્ષીય વર્ચસ્વ અને આક્રમક વલણને ડામવા માટે વૈશ્વિક મહાસત્તાઓએ પૂર્ણપણે કમર કસી લીધી છે.

આ હાઇ-વોલ્ટેજ બેઠકમાં સૌથી મોટો માથાનો દુખાવો ચીન માટે 'જયશંકર-રુબિયો'ની જોડી છે. ચીન પ્રત્યે અત્યંત સખત વલણ ધરાવતા યુએસ સેક્રેટરી ઓફ સ્ટેટ માર્કો રુબિયો અને ભારતના પ્રખર રાજદ્વારી વિદેશ મંત્રી એસ. જયશંકરનું સંયુક્ત નેતૃત્વ ડ્રેગનની આક્રમકતા સામે મજબૂત ઢાલ બનશે. ચીન અત્યાર સુધી ક્વાડને 'એશિયન નાટો' કહીને બદનામ કરવાનો પ્રયાસ કરતું હતું, પરંતુ ભારતના સ્વતંત્ર અને રાષ્ટ્રીય હિત-સંચાલિત સ્પષ્ટ વલણે ચીનની આ કથાને સંપૂર્ણપણે ઉઘાડી પાડી દીધી છે. સેકન્ડ થોમસ શોલ નજીક ફિલિપાઇન્સના સૈનિકો પર ચીની કોસ્ટ ગાર્ડના હુમલા બાદ, મનીલામાં ક્વાડની આ હાજરી ફિલિપાઇન્સ, વિયેતનામ અને ઇન્ડોનેશિયા જેવા આસિયાન દેશોને સ્પષ્ટ સંદેશ આપે છે કે તેઓ ચીનના દબાણ સામે એકલા નથી.

ભારત માટે આ બેઠક અત્યંત મહત્વપૂર્ણ છે કારણ કે દેશનો લગભગ ૫૫ ટકા દરિયાઈ વેપાર મલાક્કાની સમુદ્રધૂની અને દક્ષિણ ચીન સમુદ્રમાંથી પસાર થાય છે. ફિલિપાઇન્સને બ્રહ્મોસ મિસાઇલ સોંપ્યા બાદ હવે ક્વાડના માધ્યમથી ભારતે ચીનના ઘર આંગણે જ પોતાનો રાજદ્વારી પ્રભાવ સ્થાપિત કરી દીધો છે. જો ચીન આ વિસ્તારમાં અસ્થિરતા ઉભી કરવાનો પ્રયાસ કરશે તો ભારત આંદામાન અને નિકોબાર ટાપુઓ પાસે મલાક્કા સ્ટ્રેટ પરથી ચીનના દરિયાઈ વેપાર માર્ગને રોકવાની પૂરી ક્ષમતા ધરાવે છે.